vitamin B Archives - Kalusugan.ph

Kahalagahan ng Vitamin B12 o Cobalamin

March 17, 2015 by ivancultura

Ang Vitamin B12 o Cobalamin ay isa sa walong uri ng Vitamin B na may malaking papel sa metabolismo ng mga cell, at sa pagbuo at pagreregulisa ng DNA. Kilala ang Vitamin B12 bilang pinakamalaki at pinakakomplikadong uri ng bitamina na tinatanggap ng tao. Ito ay responsable sa maayos na paggana ng utak at iba pang bahagi ng central nervous system, at sa pagbuo ng dugo. Tumutulong din ito sa metabolismo ng mga taba (fats) at mga amino acid. Karaniwan itong nakukuha sa mga karne, isda, at mga produktong yari sa gatas. Ang bitaminang ito rin ay maaaring mabuo sa pamamagitan ng mga proseso sa laboratryo.

Ang Vitamin B12 ay maaari ding makuha sa mga supplement na karaniwang inirereseta para gamutin ang kakulangan sa Vitamin B12, kondisyon ng anemia, at maging sa pagpapabuti ng pag-iisip at memorya.

Gaano karaming Vitamin B12 ang kailangan ng katawan sa araw-araw?

Ang rekomendadong dami ng vitamin B12 na dapat tanggapin sa bawat araw ng isang taong nasa hustong edad ay 2.4 micrograms. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B12?

Dahil ang Vitamin B12 ay madaling humahalo sa tubig (water soluble), ito ay madaling nareregulisa ng katawan. Kaya naman, bibihira lamang ang kaso ng pagkaoverdose nito. Walang itinakdang limitasyon para dito sapagkat ang kasobrahan nito ay maaaring mailabas bilang ihi o kaya ay maiimbak sa atay.

Ano ang epekto sa katawan kung kulang ang Vitamin B12?

Ang katamtamang kakulangan ng Vitamin B12 ay maaaring humantong sa pagkakaroon ng anemia, madaling pagkapagod, depresyon at problema sa pagmememorya, habang ang sobrang kakulangan naman ay maaaring magresulta sa pagkakaroon ng pinsala sa utak at central nervous system

10 Pagkain na Mayaman sa Vitamin B12

1. Talaba

Ang mga lamang-dagat na nasa shell gaya ng talaba, tulya at tahong ay kilalang mayaman sa Vitamin B12. Halimbawa, sa 100 gramo ng talaba o oyster, maaaring makakuha ng hanggang 11.5 microgram ng cobalamin.

2. Atay

Ang atay ay mayroon ding mataas na lebel ng cobalamin. Halimbawa rin, sa 100 gramo ng atay ng manok, mayroong 3.22 microgram ng cobalamin.

3. Tuna

Ang isdang tuna ay mayroon namang 10.9 microgram ng cobalamin sa bawat 100 gramo nito.

4. Sardinas

Ang sardinas na nakalata na karaniwang kinakain ng mga Pilipino ay may mataas na Vitamin B12. Hanggang 3.6 microgram ng cobalamin ang maaaring makuha dito.

5. Alimango

Ang 100 gramo naman ng laman ng alimango ay maaaring makuhanan ng hanggang 11.5 microgram ng Vitamin B12.

6. Tokwa

Ang isang pakete ng tokwa na umaabot sa 91 na gramo ay maaaring makuhanan ng hanggang 2.2 microgram ng Vitamin B12.

7. Karneng baka

Ang karne ng baka ay maaari ding makuhanan ng Vitamin B12 na tinatayang umaabot sa 6 microgram ng cobalamin. Ito ay sa bawat 100 gramo ng purong laman ng karneng baka.

8. Keso

Umaabot naman sa 3.3 microgram ng cobalamin ang maaaring makuha sa 100 gramo ng keso.

9. Itlog

Sa isang buong itlog na may katamtamang laki, maaaring makakuha ng hanggang 0.36 microgram ng Vitamin B12. Dapat tandaan na ang karamihan ng bitamina ay nakasentro sa pula ng itlog.

10. Karneng manok

Ang cobalamin sa isang tasa o 140 na gramo ng purong karne ng manok ay maaaring umabot sa 0.43 microgram.

Filed Under: Buhay Sigla, Nutrisyon at Sustansya Tagged With: Cobalamin, vitamin B, Vitamin B12, vitamins

Kahalagahan ng Vitamin B9 o Folate

March 16, 2015 by ivancultura

Ang vitamin B9 ay isa sa walong uri ng Vitamin B na mahalaga sa maayos na paggana ng katawan. Ang bitaminang ito na kilala rin sa tawag na folate, folicin at folic acid, at minsan rin binansagang Vitamin M, ay may mahalagang papel sa pagbuo at pag-aayos ng DNA, paglago ng cells, at maging sa proseso ng cell division. Malaki rin ang ginagampanan ng folate sa maayos na pagbubuntis ng isang ina. Karaniwang nakukuha ang Vitamin B9 sa mga buto at butil, mga madahong gulay, at mga prutas.

Ang Vitamin B9 ay maaari ding makuha sa mga supplement na karaniwang inirereseta para gamutin ang kakulangan sa Vitamin B9, kondisyon ng anemia, at para maiwasan ang pagkalaglag ng pagbububuntis sa mga kababaihan.

Gaano karaming Vitamin B9 ang kailangan ng katawan sa araw-araw?

Ang itinakdang dami ng vitamin B9 na dapat tanggapin sa bawat araw ng isang taong nasa hustong edad ay 400 micrograms. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B9?

Ang Vitamin B9 ay madaling humahalo sa tubig (water soluble) at madaling nareregulisa ng katawan kung kaya’t bibihira ang kaso ng pagkaoverdose nito. Kaya naman wala rin itinakdang limitasyon para dito.

Ano ang epekto sa katawan kung kulang ang Vitamin B9?

Ang kakulangan sa Vitamin B9 ay maaaring magdulot ng anemia, at mabagal na paglaki sa mga kabataan. Kaugnay din ng kakulangan ng bitaminang ito, maaari ding makaranas ng madaling pagkapagod, pagiging iritable, at kawalan ng gana sa pagkain. Sa mga inang nagbubuntis, ang kakulangan din ng folate ay maaaring magdulot ng depeksyon sa sanggol o kaya ay pagkalaglag ng bata.

10 Pagkain na Mayaman sa Vitamin B9

1. Munggo

Isa sa mga may pinakamataas na lebel ng folate ay ang munggo. Ang mga butong karaniwang nakikita sa hapag ng mga Pilipino ay may taglay na 320 microgram ng folate sa bawat isang tasa nito.

2. Spinach

Ang mga berde at madahong gulay tulad ng spinach ay kilala rin sa pagkakaroon ng mataas na vitamin B9. Ang isang tasa ng nilutong gulay na spinach ay maaaring makuhanan ng hanggang 263 microgram ng folate.

3. Asparagus

Ang gulay na asparagus ay mapagkukunan din ng folate. Ang kalahating tasa nito ay maaaring makuhanan ng hanggang 134 microgram ng folate.

4. Letsugas

Ang isang tasa naman ng gulay na letsugas o lettuce ay mayroon ding folate na tinatayang aabot sa 64 microgram.

5. Abukado

Ang isang buong prutas naman ng abukado na may katamtamang laki ay maaaring mapagkunan ng hanggang 163 microgram ng folate.

6. Broccoli

Mayroon namang 168 microgram ng vitamin B9 sa isang tasa ng hiniwang gulay na broccoli.

7. Mangga

Ang prutas na mangga na isa ring karaniwang bilihin sa mga palengke ay maaaring mapagkunan ng vitamin B9. Hanggang 145 microgram ng folate ang maaaring makuha sa isang buong prutas na ito.

8. Papaya

Ang isang buong prutas ng papaya ay makukuhanan din ng Vitamin B9 at ito ay umaabot sa 60 microgram.

9. Orange

Ang isang buong prutas na orange ay makukuhanan ng hanggang 47 microgram ng folate, habang ang isang tasa ng katas ng prutas na ito ay mayroon namang 76 microgram ng folate.

10. Okra

Ang kalahating tasa ng gulay na okra ay maaaring makuhanan ng hanggang 30 microgram ng folate.

Filed Under: Buhay Sigla, Nutrisyon at Sustansya Tagged With: Folate, folic acid, vitamin B, Vitamin B9, vitamins

Kahalagahan ng Vitamin B7 o Biotin

March 16, 2015 by ivancultura

Ang vitamin B7 o biotin ay isa sa walong uri ng Vitamin B na mahalaga sa maayos na paggana ng katawan. Ang biotin ay responsable sa maayos na pagpoproseso ng taba (fats) at carbohydrates. Tumutulong din ito sa pagmementena ng balanse ng asukal sa dugo at pagkakaroon ng malusog na balat. Ang bitaminang ito na minsan ay kinilala bilang Vitamin H, ay kadalasang nakukuha sa mga pagkaing mani, bungang ugat, at itlog.

Ang Vitamin B7 ay maaari ding makuha sa mga supplement na karaniwang inirereseta para gamutin ang kakulangan sa Vitamin B7, paglalagas ng buhok, pagbibitak ng mga kuko, pagkakaroon ng dermatits, karaniwang kaso ng diabetes, at depresyon.

Gaano karaming Vitamin B7 ang kailangan ng katawan sa araw-araw?

Ang itinakdang dami ng vitamin B7 na dapat tanggapin sa bawat araw ng isang taong nasa hustong edad ay 30 micrograms. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B7?

Wala pang kaso ng pagkakaranas ng masamang epekto dahil sa sobrang pagkonsumo ng Vitamin B7. Kaya naman, wala ring itinakdang limitasyon sa pagtanggap ng bitaminang ito sa bawat araw. Ang Vitamin B7 ay madaling humahalo sa tubig (water soluble) at madaling nareregulisa ng katawan kung kaya’t bibihira ang kaso ng pagkaoverdose nito.

Ano ang epekto sa katawan kung kulang ang Vitamin B7?

Ang kakulangan naman ng Vitamin B7, bagaman ito ay bibihirang kaso din, ay maaaring magdulot ng madaling pagkalagas ng buhok, madaling pagkapagod, depresyon, pagliliyo, pananakit ng mga kalamnan, at pagkakaroon ng anemia.

10 Pagkain na Mayaman sa Vitamin B7

1. Mani

Ang mani ang isa sa mga may pinakamataas na mapagkukunan ng Vitamin B7. Ang kalahating tasa ng mani ay maaaring mapagkunan ng hanggang 52.6 microgram ng biotin o katumbas ng 175% ng pang-araw-araw na pangangailangan ng katawan sa Vitamin B7.

2. Kamatis

Ang isang tasa ng kamatis ay maaaring makuhanan ng hanggang 7.2 microgram ng biotin o katumbas ng 24% ng pang-araw-raw na pangangailangan.

3. Itlog

Ang itlog na kilalang mapagkukunan ng iba’t ibang bitamina at sustansya ay maaari ding mapagkunan ng Vitamin B7. Tinatayang aabot sa 8 microgram ng biotin ang maaaring makuha sa isang itlog na may katamtamang laki.

4. Sibuyas

Ang isang tasa naman ng sibuyas ay maaari ding mapagkunan ng hanggang 8 microgram ng biotin.

5. Karot

Mayroon ding Vitamin B7 sa gulay na karot. Maaaring umabot sa 6.1 microgram ng biotin ang makukuha sa isang tasa ng karot.

6. Cauliflower

Ang isang tasa din ng gulay na cauliflower ay maaaring ding makuhanan ng 1.61 microgram ng Vitamin B7.

7. Kamote

Ang isang kamote naman na may katamtamang laki ay maaaring makuhanan ng biotin na maaaring umabot sa 8.6 microgram.

8. Salmon

Mayroong 4.5 microgram ng biotin ang maaaring makuha sa 4 oz ng isdang salmon.

9. Saging

Ang isang saging na may katamtamang laki ay maaaring makuhanan ng hanggang 3.07 microgram ng biotin.

10. Strawberry

Ang mapupulang strawberry ay maaari ding makuhanan ng vitamin B7. Ang isang tasa nito ay maaaring makuhanan ng hanggang 1.58 microgram ng vitamin B7.

Filed Under: Buhay Sigla, Nutrisyon at Sustansya Tagged With: Biotin, vitamin B, Vitamin B7, vitamins

Kahalagahan ng Vitamin B6 o Pyridoxine

March 6, 2015 by ivancultura

Ang Vitamin B6 o Pyridoxine (maaari ring pyridoxal o pyridoxamine) ay isa sa walong uri ng Vitamin B na tumutulong sa katawan sa maaayos na metabolismo ng red blood cells, nervous system, resistensya ng katawan, at marami pang iba. Ang bitaming ito, na isang water soluble o madaling humalo sa tubig, ay kadalasang nakikita sa mga mani, karne, ilang prutas at gulay.

Gaano karaming Vitamin B6 ang kailangan ng katawan sa araw-araw?

Ang itinakdang dami ng vitamin B6 na dapat tanggapin sa bawat araw ng isang taong nasa hustong edad ay 2 mg. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B6?

Ang Vitamin B6 ay madaling humahalo sa tubig (water soluble) at madaling nareregulisa ng katawan kung kaya’t bibihira ang kaso ng pagkaoverdose nito. Ang sobrang Vitamin B6 ay kadalasang nakukuha lamang sa pag-inom ng mga supplement. Ang kasobrahan nito ay maaaring magdulot ng pinsala sa mga nerves sa mga binti at braso.

Ano ang epekto sa katawan kung kulang ang Vitamin B6?

Ang kakulangan naman sa Vitamin B6 ay kadalasang humahantong sa pagkakaroon ng sakit sa balat (dermatitis), depresyon, pagkabalisa, pagkalito, at pagkokombulsyon. Maaari ring sakit na may kaugnayan sa dugo gaya ng anemia at sakit sa puso.

10 Pagkain na Mayaman sa Vitamin B6

1. Bigas

Ang bigas na karaniwang pagkain ng mga Pilipino ay kilalang mayaman sa Vitamin B. Ang isang tasa ng kanin ay mayroong 4.80 mg ng pyridoxine.

2. Bawang

Pangkaraniwan din ang bawang sa mga lutuin ng mga Pilipino. Kaya madali lang rin makakakuha ng Vitamin B6 mula dito. Ang tatlong cloves ng bawang ay maaaring makuhanan ng hanggang 0.11 mg ng pyridoxine.

3. Tuna

Ang isdang tuna ay hindi rin naman mahirap mahanap sa mga pamilihan. Ito ay mapagkukunan ng hanggang 1.04 mg ng Vitamin B6.

4. Karneng manok

Umaabot naman sa 0.56 mg ng Vitamin B6 ang maaaring makuha sa kalahating dibdib ng manok.

5. Karneng baboy

Ang isang hiwa naman ng pork chop ay kayang makapagbigay ng hanggang 0.60 mg ng pyridoxine.

6. Pasas

Ang pasas, o pinatuyong ubas, ay may mataas din na Vitamin B6. Hanggang 0.28 mg ng Vitamin B6 ang maaaring makuha sa kalahating tasa ng pasas.

7. Kareng baka

Ang 100 gramo naman ng karneng baka, lalo na yung tinatawag na “red meat” ay maaring makuhanan ng hanggang 0.68 mg ng pyridoxine.

8. Saging

Ang isang saging na maaaring katumbas ng 118 na gramo, ay maaaring mapagkunan ng hanggang 0.43 mg ng Vitamin B6.

9. Abukado

Bukod sa saging, ang prutas na abukado ay kilala ring pinagmumulan ng Ang isang buong prutas na abukado ay mayroong 0.39 mg ng pyridoxine.

10. Spinach

Ang madahong gulay na spinach ay mayroon ding vitamin B6. Ang kalahating tasa nito na katumbas ng 90 gramo ng dahon ay mapagkukunan ng 0.22 mg ng Vitamin B6.

Filed Under: Buhay Sigla, Nutrisyon at Sustansya Tagged With: Pyridoxine, vitamin B, Vitamin B6, vitamins

Kahalagahan ng Vitamin B5 o Pantothenic Acid

February 27, 2015 by ivancultura

Ang Vitamin B5 o Pantothenic acid ay isa sa walong Vitamin B na mahalaga sa metabolismo at pagpoproseso ng taba (fats), at maayos na paggana ng mga cells sa katawan. Malaki rin ang papel ng pantothenic acid upang magamit ng katawan ang carbohydrates, protina, lipids, at sa pagpapanatiling malusog ng balat. Ito ay karaniwang nakikita sa mga karne, gulay, mga butil, gatas at itlog.

Ang Vitamin B5 ay maaari ding makuha sa mga supplement na karaniwang inirereseta para gamutin ang kakulangan sa Vitamin B5, pagtatagihawat, kondisyon ng alcoholism, hika, pagkokombulsyon, depresyon, mababang presyon ng dugo, at pagpapabuti ng resistensya ng katawan.

Gaano karaming Vitamin B5 ang kailangan ng katawan sa araw-araw?

Ang itinakdang dami ng vitamin B5 na dapat tanggapin sa bawat araw ng isang taong nasa hustong edad ay 10 mg. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B5?

Ang Vitamin B5 ay madaling humahalo sa tubig (water soluble) at madaling nareregulisa ng katawan kung kaya’t bibihira ang kaso ng pagkaoverdose nito. Ang sobrang Vitamin B5 ay kadalasang nakukuha lamang sa pag-inom ng mga supplement. Ang kasobrahan nito ay maaaring magdulot lamang ng bahagyang pananakit ng tiyan at pagtatae.

Ano ang epekto sa katawan kung kulang ang Vitamin B5?

Ang kakulangan naman ng Vitamin B5, bagaman ito ay bibihirang kaso din, ay maaaring magdulot ng madaling pagka-irita, madaling pagkapagod, pagkatamlay, pamamanhid, at pamumulikat ng mga kalamnan. Maaari din itong magdulot ng sobrang reaksyon sa insulin at pagkababa ng asukal sa dugo.

10 Pagkain na Mayaman sa Vitamin B5

1. Shitake Mushroom

Kilala ang shiitake mushroom bilang sangkap sa ilang pagkaing mabibili sa mga Japanese at Chinese restaurant. Ang isang tasa ng kabuteng ito ay maaaring makuhanan ng hanggang 5.21 mg ng pantothenic acid.

2. Keso

Ang mga keso, lalo na yung nagmula sa gatas ng kambing ay maaari din makuhanan ng Vitamin B5. Tinatayang aabot sa 3.35 mg ng pantothenic acid ang maaaring makuha sa 100 gramo ng keso na nagmula sa gatas ng kambing.

3. Tuna

Ang mga isda gaya ng salmon at tuna ay mayaman din sa Vitamin B5. Mayroong 2.24 mg na pantothenic acid ang maaaring makuha sa 100 gramo ng isdang ito.

4. Abukado

Ang isang buong bunga ng prutas na abukado ay maaaring makuhanan ng hanggang 1.99 mg ng pantothenic acid.

5. Itlog

Ang itlog naman na may katamtamang laki ay maaaring makuhanan ng hanggang 0.70 mg ng Vitamin B5.

6. Karne ng baboy

Ang isang hiwa ng pork chop ay tinatayang makukuhanan ng hanggang 1.41 mg ng Vitamin B5.

7. Karne ng baka

Ang karneng baka naman na umaabot sa 100 gramo ay maaaring makuhanan ng hanggang 1.32 mg ng Vitamin B5.

8. Karne ng manok

Maaari ding makakuha ng Vitamin B5 sa karne ng manok. Halimbawa sa isang drumstick ng manok, o isang hita nito, maaaring makakuha ng 0.55 mg ng pantothenic acid.

9. Buto ng sunflower

Ang isang tasa naman ng buto ng sunflower ay makukuhanan din ng hanggang 9.46 mg ng Vitamin B5.

10. Kamote

Ang isang kamote na may katamtamang laki ay maaaring makuhanan ng 1.01 mg ng Vitamin B5.

Filed Under: Buhay Sigla, Nutrisyon at Sustansya Tagged With: vitamin B, Vitamin B5, vitamins

Kahalagahan ng Vitamin B3 o Niacin

February 26, 2015 by ivancultura

Ang Vitamin B3 o niacin ay isa sa walong Vitamin B na responsable sa pagpoproseso ng taba (fats) sa katawan, pagpapababa ng cholesterol sa katawan, at pagreregulisa ng asukal sa dugo. May mga ebidensya rin na nagsasabing nakatutulong ang niacin sa pagpapabuti ng kalusugan ng puso at mga ugat na daluyan ng dugo. Ang Vitamin B3 ay natural na nakukuha sa mga karne, isda, atay, at mga butil.

Gaano karaming Vitamin B3 ang kailangan ng katawan sa araw-araw?

Ang itinakdang dami ng vitamin B3 na dapat tanggapin sa bawat araw ng isang taong nasa hustong edad ay 20 mg. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B3?

Ang Vitamin B3 ay madaling humahalo sa tubig (water soluble) at madaling nareregulisa ng katawan kung kaya’t bibihira ang kaso ng pagkaoverdose nito. Ang sobrang Vitamin B3 ay kadalasang nakukuha lamang sa mga supplement. Ang kasobrahan nito ay maaaring magdulot ng pamumula at panunuyo ng balat, at ilang mga kondisyon sa daluyan ng pagkain. Kung mapapabayaan, maaari itong humantong sa pagkakaroon ng karamdaman sa atay, mataas na asukal sa dugo at diabetes, at problema sa ipinagbubuntis.

Ano ang epekto sa katawan kung kulang ang Vitamin B3?

Ang kakulangan naman sa Vitamin B3 ay maaring magdulot ng pellagra, ang kondisyon ng pagtatae, pagkakaroon ng sakit sa balat, pagkalimot, pagdedeliryo at pamamaga ng bibig. Nakapagdudulot din ito ng pagkabalisa, pagkapagod, pagkabagabag at depresyon. Kung mapapabayaan, maaari din itong makamatay.

10 Pagkain na Mayaman sa Vitamin B3

1. Tuna

Kilala ang isdang tuna sa pakakaroon ng mataas na lebel ng Vitamin B3. Mayroong 22.1 mg ng niacin sa 100 gramo ng isdang tuna. Bukod sa tuna, makukuhanan din ng niacin ang isdang salmon, mackerel, at swordfish.

2. Karne ng manok

Ang karne ng manok, partikular sa parte ng dibdib ay may mataas din na lebel ng Vitamin B3. Tinatayang aabot sa 14.8 mg ng niacin ang makukuha sa 100 gramo ng dibdib ng manok.

3. Karne ng baboy

Ang karne ng baboy ay mayroon ding Vitamin B3. Aabot sa 15.4 mg ng niacin ang mayroon sa isang hiwa ng porkchop.

4. Atay

Ang atay ng manok, baboy o baka ay kilala ring mayaman sa Vitamin B3. Halimbawa sa atay ng manok, mayroong 11.4 mg ng niacin sa 85 na gramo nito.

5. Mani

Ang isang tasa ng mani ay maaaring mapagkunan ng hanggang 19.9 mg ng Vitamin B3.

6. Karne ng baka

Ang 100 gramo ng karneng baka ay maaaring makunan ng hanggang 9 mg ng niacin.

7. Kabute

Ang isang tasa ng kabute ay mayroong 7.6 mg ng niacin.

8. Green peas

Mayroon namang 3.0 mg ng niacin sa isang tasa ng sariwang green peas.

9. Kanin

Ang bigas na pangunahing pagkain ng mga Pilipino ay makukunan ng 40.1 mg sa bawat tasa nito.

10. Abukado

Ang isang bunga ng prutas na abukado na may katamtamang laki ay mapagkukunan din ng hanggang 3.5 mg ng niacin.

Filed Under: Buhay Sigla, Itanong kay Doc, Nutrisyon at Sustansya Tagged With: vitamin B, Vitamin B3, vitamins

Kahalagahan ng Vitamin B2 o Riboflavin

February 25, 2015 by ivancultura

Ang Vitamin B2 o riboflavin ay isa sa walong Vitamin B na mahalaga sa metabolismo ng pagkain upang magamit ng katawan bilang enerhiya. Mahalaga ring ginagampanan ng bitaminang ito ang maraming papel sa maayos na paggana ng mga cells sa katawan. Ang natural na vitamin B2 ay kadalasang nakukuha sa gatas, karne, itlog, mga mani, at ilang gulay.

Mayroon ding mga Vitamin B2 na nakahanda bilang gamot o supplement na maaaring ireseta para sa kakulangan ng riboflavin sa katawan, pag-iwas sa cervical cancer at pananakit ng ulo dahil sa migraine. Ginagamit din ang supplement para mabawasan ang pagtatagihawat, pananakit ng kalamnan dahil sa pulikat, at pagpapabuti ng kondisyon ng mata na mayroong katarata at glaucoma.

Gaano karaming Vitamin B2 ang kailangan ng katawan sa araw-araw?

Ang itinakdang dami ng vitamin B2 na dapat tanggapin sa bawat araw ng isang taong nasa hustong edad ay 1.7 mg. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B2?

Ang Vitamin B2 ay ligtas at walang tiyak na epekto sa katawan ang sobrang sa pagtanggap nito. Dahil ito ay madaling humalo sa tubig (water soluble), madaling nailalabas ang sobrang riboflavin bilang ihi. Maaari lamang itong magdulot ng paninilaw sa ihi. Sa ngayon ay walang nakatakdang limitasyon sa pagtanggap ng Vitamin B2 sa katawan.

Ano ang epekto sa katawan kung kulang ang Vitamin B2?

Ang kakulangan sa Vitamin B2 ay maaaring magdulot ng pabibitak-bitak ng labi, pamamaga at pagkakaroon ng mga singaw sa bibig, pananakit ng lalamunan, at makadagdag ng posibilidad ng pagkakaroon ng iron deficiency anemia.

10 Pagkain na Mayaman sa Vitamin B2

1. Keso

Isa sa mga pagkaing may pinakamataas na lebel ng Vitamin B2 ay mga keso, lalo na ang kesong nagmula sa gatas ng kambing. Tinatayang aabot sa 1.38 mg ng Vitamin B2 ang makukuha sa 100 gramo ng kesong mula sa gatas ng kambing.

2. Almond

Ang isang tasa ng almond ay maaaring mapagkunan ng hanggang 1.45 mg ng riboflavin.

3. Karne ng baka

Ang karneng baka na madali namang nabibili sa mga pamilihan ay mayaman rin sa Vitamin B2. Aabot sa 0.86 mg ng riboflavin ang maaaring makuha sa 100 gramo ng karne.

4. Salmon

Ang isdang salmon ay kilalang mapagkukunan ng Vitamin B2. Mayroong 0.19 mg ng riboflavin sa 85 na gramo ng isdang ito.

5. Itlog

Ang itlog ay mayroon ding vitamin B2. Ang isang itlog na may katamtamang laki ay mapagkukunan ng hanggang 0.26 mg ng Vitamin B2.

6. Karne ng baboy

Ang karneng baboy rin ay mayaman sa Vitamin B2. Ang isang hiwa ng pork chop ay tinatayang mapagkukunan ng 0.43 mg ng Vitamin B2.

7. Kabute

Ang isang tasa ng kabute ay maaaring mapagkunan ng hanggang 0.43 mg ng Vitamin B2.

8. Sesame seeds

Ang maliliit na butil ng sesame seeds ay kilalang napagkukunan din ng Vitamin B2. Ang isang tasa nito ay maaaring mapagkunan ng hanggang 0.60 mg ng Vitamin B2.

9. Pusit

Ang mga seafood gaya ng pusit ay mayroon ding Vitamin B2. Tintatayang may 0.46 mg ng riboflavin sa 100 gramo ng pusit.

10. Spinach

Mapagkukunan din ng Vitamin B2 ang mga berde at madahong gulay tulad ng spinach. Mayroong 0.24 mg ng riboflavin sa 100 gramo ng dahong gulay na ito.

Filed Under: Buhay Sigla, Nutrisyon at Sustansya Tagged With: vitamin B, Vitamin B2, vitamins

Kahalagahan ng Vitamin B1 o Thiamine

February 18, 2015 by ivancultura

Ang Vitamin B ay mahalaga sa maayos na metabolismo ng pagkain upang magamit ng katawan bilang enerhiya. Mahalaga rin ito para magamit ng katawan ang protina at mga taba (fats). Mayroong walong uri ng Vitamin B, at kabilang dito ang Vitamin B1 o Thiamin na importante para sa maayos na paggana ng bawat cells sa katawan. Ang thiamine ay maaaring makuha sa mga prutas at gulay at sa mga karne.

Gaano karaming Vitamin B1 ang kailangan ng katawan sa araw-araw?

Ang itinakdang dami ng vitamin B1 na dapat tanggapin sa bawat araw ng isang taong nasa hustong edad ay 1.4 mg. Ito ay maaari pa ring magbago, depende sa kondisyong nararanasan gaya ng pagbubuntis, katandaan, o kaya pagkakaroon ng karamdaman.

Ano ang maaaring mangyari kung sumobra sa Vitamin B1?

Ang Vitamin B1 ay ligtas at walang tiyak na epekto sa katawan ang pagsobra sa pagtanggap nito. May ilang pag-aaral pa na nagsasabing nakabubuti sa paggana ng utak ang karagdagang Vitamin B1. Sa ngayon ay walang nakatakdang limitasyon sa pagtanggap ng Vitamin B1 sa katawan.

Ano ang epekto sa katawan kung kulang ang Vitamin B1?

Ang kakulangan sa Vitamin B1 ay maaaring magdulot ng panghihina ng katawan particular nervous system at sa sirkulasyon ng dugo, na sa kalaunan ay maaaring makamatay. Kadalasang humahantong sa pagkakaroon ng sakit na beriberi at Wernicke-Korsakoff syndrome. Ito ay mga sakit na nakapagdudulot ng pagkapagod at panghihina ng puso at mga ugat na daluyan ng dugo, mga kalamnan, tiyan at bituka, at nervous system.

10 Pagkain na Mayaman sa Vitamin B1

1. Kanin

Ang kanin na isa sa mga pangunahing pagkain ng mga Pilipino ay isa sa mga mayamang mapagkukunan ng Vitamin B1. Mayroon itong 3.25 mg ng Vitamin B1 sa bawat tasa ng kanin.

2. Karneng baboy

Mayroong 2.66 mg na Vitamin B1 sa isang hiwa ng pork chop.

3. Mani

Ang isang tasa ng mani ay maaaring mapagkunan ng 0.44 mg ng Vitamin B1.

4. Buto ng sunflower

Ang isa ring paboritong pulutan ay kilalang mayaman din sa Vitamin B1. Tinatayang aabot sa 0.68 mg ang Vitamin B1 na makukuha sa isang tasa ng buto ng sunflower.

5. Tinapay

Ang Vitamin B1 na makukuha sa baway slice ng tinapay ay tinatayang aabot sa 0.14 mg. Ito ay katumbas ng 9% ng pang-araw-araw pangangailangan ng tao sa Vitamin B1.

6. Green peas

Ang isang tasa ng green peas ay mayroong 0.45 mg ng Vitamin B1.

7. Kalabasa

Ang kalabasa na kilalang mayaman sa Vitamin A ay mapagkukunan din ng Vitamin B1. Umaabot sa 0.17 mg ng Vitamin B1 ang 100 gramo ng gulay na ito.

8. Okra

Ang gulay na okra ay maaring mapagkunan ng Vitamin B1. Ang isang tasa nito ay mayroong 0.20 mg ng Vitamin B1.

9. Pasta

Ang mga pasta tulad ng spaghetti at macaroni ay may mataas din na Vitamin B1. Tinatayang aabot sa 0.49 mg ng Vitamin B1 sa bawat 100 gramo ng pasta.

10. Sesame seeds

Ang 100 gramo ng buto ng sesame ay mayroong 1.21 mg ng Vitamin B1.

Filed Under: Buhay Sigla, Nutrisyon at Sustansya Tagged With: Sustansya, thiamine, vitamin B, vitamins

Kaalaman sa Gamot na Folic Acid

January 29, 2015 by ivancultura

Generic name: folic acid

Brand name: Actimed Folic Acid, Enhansid, Folard, GNC Folic Acid, Purifol

Para saan ang gamot na ito?

Ang folic acid ay isang uri ng Vitamin B na natural na nakikita sa mga pagkaing gaya ng mga buto at butil (lentils, peas, beans), orange, atay, asparagus, broccoli at spinach. Ito ay tumutulong sa pagbuo at pagmentena ng mga bagong cells sa katawan at pinipigilan din nito ang mga pagbabago sa istraktura ng DNA upang mapigilan ang pagkakaroon ng kanser. Ang gamot na folic acid ay inirereseta kung sakaling may kakulangan ng folic acid sa katawan.

Anu-ano ang mga preparasyon ng gamot na Folic Acid?

Ang gamot na folic acid ay maaaring nakahanda bilang tableta, gamot na tinuturok, o kaya ay pulbos na tinitimpla.

Paano ito ginagamit?

Dahil ang paggamit ng gamot na ito ay naiiba-iba depende kung ano at kung gaano kalala ang kondisyon na nararanasan, gamitin lamang ang gamot na ito ayon sa inireseta ng doktor.

Ang gamot na folic acid ay maaaring inumin nang may laman ang tiyan o kaya’y walang laman.
Ang tableta ay inumin ng isang buo at huwag hahatiin o dudurugin, sabayan ng isang basong tubig.
Kung sakaling makalimutan ang pag-inom, agad na inumin ang gamot sa oras na maalala. Ngunit kung malapit na sa oras ng kasunod na pag-inom, ituloy na lamang ang nakatakdang pag-inom at huwag nang balikan ang nakaligtaang pag-inom.
Hanggat hindi pinapayo ng doktor, huwag doblehin ang iniinom na gamot o ibahin ang oras ng pag-inom nito.
Itago sa refrigerator o sa lugar na may katamtamang temperatura at iwasang mabilad sa araw. Ilayo rin ito sa maabot ng mga bata. Agad ding itapon ang napasong gamot.

Ano ang mga dapat tandaan sa paggamit ng Folic Acid?

Bago resetahan ng gamot, ipaalam kaagad sa doktor kung ikaw ay may kondisyon gaya ng sumusunod:

allergy sa folic acid
buntis, may planong magbuntis, o nagpapasuso
problema sa atay at bato
hemolytic anemia
sumasailalim sa dialysis
madalas umiinom ng alak
pagkakaroon ng impektsyon sa katawan

Ang gamot na folic acid ay hindi mahusay na pampalit sa sustansyang natural na nakukuha sa sa mga pagkain. Ito ay karagdagang nutrisyon lamang kung sakaling may kakulangan ng folic acid sa katawan. Makabubuti pa rin ang pagkain ng balanse at masusustansyang pagkain.

Gamitin lamang ang folic acid nang naaayon sa inireseta ng doktor, o nakasunod sa direksyon na nakasulat sa pakete ng gamot. Mahalaga din na sundin ang nakatakdang pagbisita sa doktor upang mabantayan progreso ng paggagamot sa sakit, malaman kung may pagbabago sa dami ng gamot na iinumin, o matignan kung may karagdagan pang pagsusuri na gagawin habang ginagamot.

Paano ang pag-gamit nito sa mga bata?

Ang pag-inom ng folic acid sa mga kabataan ay nangangailangan ng masusing gabay mula sa doktor. Huwag basta-basta magbibigay ng gamot nang hindi kumukunsulta sa doktor o pediatrician.

May side effects ba ang Folic Acid?

Bagaman ang side effects mula sa pag-inom ng gamot na folic acid ay bibihira, lalo na kung susunding mabuti ang direksyon ng pag-inom nito, hindi pa rin nawawala ang posibilidad ng pagkakaranas ng mga side effect. Narito ang ilan sa mga karaniwang epekto ng pag-inom ng folic acid.

pagpapantal, hirap sa pag-hinga, at pamamaga ng katawan na sintomas ng allergy
pagliliyo at kawalan ng gana sa pagkain
pagkakabag
pag-iiba ng panlasa
problema sa pagtulog
pagiging iritable

Kung nababahala sa epektong nararanasan, agad na kumunsulta sa doktor upang magabayan.

Ano ang maaaring mangyari kung mapasobra ang pag-gamit ng gamot?

Ang sobrang pag-inom ng folic acid ay maaaring magdulot ng pamamanhid ng mga kamay, pananakit ng bibig at dila, panghihina, pagkalito, madaling pagkapagod, at hirap sa konsentrasyon. Agad na magtungo sa pagamutan sa oras na maoverdose ng gamot na ito.

Filed Under: Gamot Tagged With: folic acid, gamot, vitamin B