Mga tanong tungkol sa TB o tuberculosis

Posible bang bumalik ang TB kahit nagamot na?

Q: Nagkaroon na po ako ng TB dati, naggamot ako ng 6 months..after 1 year nakakaramdam na naman ako ng sintomas ng TB gaya ng hirap na paghinga, ubong may 3 linggo ng mahigit at pagkahapo, madaling mapagod…posible bang bumalik ang sakit ko dati? lagi pa masakit ulo ko…

A: Oo, maaring bumalik ang TB. Sa totoo, kapag nagkaron ka na ng TB, kahit na ikaw ay sumailalim sa 6 months na gamutan, may matitirang konting bacteria sa iyong katawan, na maaaring maging sanhi ng pagbabalik ng iyong sakit. Ito ay tinatawag na “treatment relapse”, at tulad mo ang mga ganitong kaso ay nangyayari sa loob ng 6 na buwan makalipas ang gamutan. Kaya mabuti at alerto ka sa mga sintomas nito.

Hindi rekomendado na inumin mo lamang muli ang iniinom mong gamot dati. Sa halip, umalik ka sa DOTS center o sa doktor na gumamot sa iyong TB noong una at ipaliwanag mo ang iyong mga sintomas. Karaniwan, mas maraming gamot at mas mahaba ang gamutan ang irereseta sa iyong kaso upang masigurado na makatapos ang gamutan sa iyong karamdaman ay hindi na ito babalik.

Maari bang magkaron ng TB sa leeg?

Q: Hi po,.,dito po ako sa Dubai ngayon, at may nararamdaman akong bukol sa gilid ng kanang bahagi ng leeg ko,.,nung una po akala ko wala lang noong tumagal na po ito naging bukol na po,.sumasakit po ito pag pumipwersa ako.,pag sumasakit po at lumalaki sya,.after 4months nagpatingin ako sa fujahrah hospital,,.kinunan po ako ng dugo, X-ray at ultra sound,.,ang lumabas po sa result ay.,cervical TB.LN by ultra sound,.nagtaka po ako bakit TB? Hindi naman po ako nilalagnat, inuubo,hindi nagyuyusi at hindi rin bumaba abg timbang ko, pwede ko po ba malaman doc kung anung klasi ng bukol ito? salamat po

A: Ang TB sa leeg ay posibleng paring mangyari kahit wala kang nararamdaman na mga karaniwang sintomas ng TB. Sa katanuyan, ang TB ay maraming anyo; pinaka-karaniwan lamang ang TB sa baga at ito ay nagsasanhi ng mga mas kilalang sintomas gaya ng ubo, pagod, at iba pa. Subalit ang TB ay pwedeng nasa mga kulani ng leeg, sa buto, sa tiyan, at iba pang bahagi ng katawan.

Ang gamot para sa TB ng cervical lymph nodes ay maaring kombinasyon ng pagtanggal ng kulani at pagsusuri nito sa laboratory (excision biopsy) at kasama rin dito ang pag-inom ng mga gamot kagaya ng sa TB sa baga. Huwag kang mag-alala sapagkat at pagkakaron ng TB sa kulani ay hindi naman delikado kung maagapan.