Suhi o breech ang baby sa ultrasound: Pwede pa bang magbago?

Q: May posibilidad po ba na walong buwang buntis ay iikot pa ang bata? Kasi po, breech presentation ang resulta sa ultrasound in 32weeks & 6days po. Sa ngayon po ay 33weeks na po. Nagwoworry po ako na baka ma-Caesarian Section pa ako.

A: Oo posibleng pang ‘umikot’ o magbago ang position ng iyong baby hanggang 36 weeks o hanggang sa kabuwanan. Sa ika-36 na linggo, ipatingin ulit sa doktor ang baby at kung ito ay breech o suhi parin, pwedeng subukan ng iyong OB na iikot ang baby parang maging cephalic presentation sa pamamagitan ng tinatawag na ‘external cephalic version’. Sa ngayon, huwag munang mabahala.

Kakapanganak lang…pwede bang mabuntis na ulit?

Q: good day dok. . 🙂 worried po ako kasi kapapanganak ko lang sa first baby ko nung June 18 2013 at cesarian pa ako. . pero after po nung pagka panganak ko dinugo aq halos 1month.then nagkamens po ako nung July 23 up to August 1 (FIRST MENS mula nung pagkatapos ko manganak) e nag loving loving po kami ng mister ko. Nagyon pong September 2013 na e wala parin po ako. Nag PT po ako at nag positive agad . . buntis po ba talaga ako kapag ganun. .Sumasakit po ang puson ko at mahapdi ang pag-ihi ko. ano po kaya itong nararadaan ko. Sana po ay masagot ninyo.

Basahin: Paano malaman kung buntis?

A: Oo kung ang pagbabasihan ay ang pregnancy test, posibleng buntis ka ulit. Sa pagitan lamang ng 2-3 buwan pagkatapos manganak ng isang babae ay pwede na ulit siyang mabuntis, lalo na kung hindi siya nagpapasuso sa kanyang baby. Ang pagbalik ng mens o pagregla ay isang tanda na ikaw ay maaari na ulit mabuntis. Kaya, gaya sa una mong baby, siguraduhing magpatingin na kaagad sa doktor o sa health center para sa mga prenatal checkup at gawin ang iba pang mga paghahanda gaya ng pag-inom ng folic acid at iron.

Paano malalaman kung nakunan ang isang buntis?

Q: Paano malalaman kung nakunan ang isang buntis?

A: Sa ating mga Pinoy, kapag sinabing ‘nakunan’, ang ibig-sabihin nito ay natigil ang paglaki ng sanggol sa loob ng bahay-bata ng isang buntis, sa madaling salita, ito’y nawalan na ng buhay at hindi na matutuloy ang pagbubuntis. Ang salitang ‘nakunan’ ay maaaaring hango pa sa mga paniniwala na literal na ‘nakuha’ ng mga masamang espiritu ang buhay o diwa ng sanggol. Sa medisina, ang katumbas ng ‘nakunan’ ay ang tinatawag na ‘spontaneous abortion’. Ito’y hindi bihirang pangyayari sa mga kababaihan kaya magandang tanong ito.

Isa sa mga posibleng senyales na nakunan ang isang buntis ay kung siya ay dinudugo o nagkakaron ng vaginal bleeding o spotting, lalo na kung ito’y mas higit kaysa pangkaraniwang nararanasan ng buntis.

Pangalwa, ang pagkakaron ng kirot o sakit sa tiyan, sa balakang, o sa may bandang pwerta ay posibleng senyales rin na nakunan ang isang buntis.

Pangatlo, kung may napapansin ang isang buntis na pagbabago sa kanyang pakiramdam, halimbawa, parang sa pakiramam nya’y hindi na siya buntis at nawala na ang sintomas ng paglilihi ng biglaan, ito’y posible ring senyales na nakunan siya.

Upang makatiyak, magandang ipatingin sa isang OB-GYN upang makompirma kung talaga nga bang nakunan ang isang buntis. Isa sa mga paraan upang masuri ito ay sa pamamagitan ng ultrasound, isang paraan upang makita ang loob ng bahay-bata.

Pwede bang mabuntis kung ‘nagdikit’ lang?

Q: Doc may pag asa po bang mabuntis pero nagdikit lang naman po yung mga ano namin pero hindi po kami naghubad. Pinagdikit lang po namin.

A: Kung hindi kayo naghubad, walang pag-asang mabuntis. Sa ordinaryong kaparaanan, ang pagiging buntis ng isang babae ay maaari lamang mangyari kung ang mga ito ay natupad:

  • Ang lalaki ay nasa edad na kaya na nyang makabuntis (mga 13 pataas)
  • Ang babae ay nireregla na
  • Naipasok ng lalaki ang kanyang ari (penis) sa loob ng pwerta (vagina) ng babae
  • Nilabasan ang lalaki (ejaculation) sa loob ng pwerta ng babae

Pagkakaron ng tulo sa isang buntis

Q: Buntis po ako pero may lumalabas na kulay green sa aking puwerta na tinatawag nilang tulo ano po ang dapat kong igamot dito o dapat ko pong inuming gamot?

A: Una sa lahat, hindi tayo sigurado kung ‘tulo’ ba talaga ang lumalabas sa iyong pwerta. Maraming ibang pwedeng sanhi nito, kabilang na ang mga impeksyon na tinatawag na ‘trichomoniasis’ at ‘bacterial vaginosis’. Makati ba ang pwerta mo? Ano ang amoy ng lumalabas na tulo? Hahanapin ng doktor ang mga sagot sa tanong na ito upang makabuo ng isang diagnosis o kanyang palagay kung ano ba ang iyong nararamdaman.

Bilang isang buntis, ikaw ay may dinadalang isa pang tao – ang iyong sanggol – at dahil dito, ang gamutan ay komplikado. Huwag na huwag gagamit o iinom ng antibiotics ng walang reseta o konsulta sa doktor sapagkat may mga gamot na nakakasama sa sanggol.

Tingnan ang mga gamot na bawal sa buntis

Sa halip, isangguni ang iyong nararamdaman sa iyong OB-GYN o iba pang doktor upang mabigyang-gabay kung ano ang pwedeng gawin at anong mga gamot ang dapat inumin, kung kinakailangan.

Hepatitis B at pagbubuntis: Anong dapat gawin?

Q: Ano ang maaaring mangyari pag nabuntis ang isang may hepatitis?

A: Huwag mag-alala. Kung ikaw ay babae na ‘carrier’ ng Hepatitis B, o positive ang iyong eksaminasyon para dito, hindi naman ito nangangahulugan ng hindi ka na pwedeng mabuntis, o kung buntis ka ay ito ay mauuwi sa disgrasya. Ngunit, may mga hakbang na mahalagang gawin, at mga ito ay dapat gawin kaugnay ang iyong OB-GYN o iba pang doktor. Ang mga babanggitin ko ay gabay lamang at dapat i-sangguni sa iyong doktor:

Hepatitis B habang buntis

Habang buntis, mahalaga na ingatan mo ang iyong atay upang hindi lumala o sumpungin ang Hepatitis. Kabilang na dito ang pag-iwas sa mga gamot gaya ng Paracetamol na kung napadalas o naparami ang paggamit ay pwedeng maka-apekto sa atay. Huwag na huwag iinom ng alak.

Hepatitis B sa panganganak

Pagkatapos na pagkatapos ng pagkapanganak, huwag na huwag kakaligtaan ang pagpapabakuna ng iyong baby sa Hepatitis B (Hepatitis B vaccine) at ang pagturok sa kanya ng Hepatitis B Immunoglobulin (HBIG). May follow-up ang bakunang ito at dapat ito’y ituloy ng walang palya. Tingnan ang mga mahalagang bakuna para sa mga baby sa Kalusugan.PH.

Hepatitis B at pagpapasuso

Ayon sa mga pag-aaral, wala namang dagdag na panganib o risk ang pagpapasuso sa kanilang mga sanggol ng mga babae na may Hepatitis B, basta siguradong mayroon at patuloy ang mga bakuna sa sanggol.

Mga Tanong: Anong gagawin pagkatapos ng Caesarian Section?

Kailan ako pwedeng magtrabahong muli pagkatapos ng Caesarian Section?

Sa unang linggo pagkatapos kang pauwiin, dapat pahinga lang muna, at syempre, ang pag-aalaga sa iyong baby. Iwasan ang mga trabahong mahihirap, ang pagbubuhat ng mga mabibigat, pag-iri, at pagtayo ng matagal. Ayos lang ang paglalakad, sa katunayan, ito’y makakatulong pa nga, basta dahan-dahanin lang sa umpisa.

Kailan ako pwede na ulit makipag-sex pagkatapos ng Caesarian section?

Konsultahin ang iyong doktor kung ano ang kanyang payo. Kalimitan, ang pakikipagtalik ang pwede na sa loob ng isang buwan.

Pwede bang maligo pagkatapos ng Caesarian Section?

Ang mahalaga ay panatilihing malinis at tuyo ang tahi ng operasyon, subalit ang paghuhugas ng ibang bahagi ng katawan ay ayos lang. Sa loob ng isa o dalawang linggo ay pwede naring maligo, subalit mas magandang hingin ang payo mismo ng iyong doktor.

Anong dapat kainin pagkatapos ng Caesarian section?

Uminom ng maraming tubig, at kumain ng pagkain na may sapat na sustansya at gulay. Dahil ayaw nating umiri masyado at maging tibi ang dumi, kumain ng mga pagkain na mataas sa fiber.

May mga bawal bang kainin o inumin?

Wala naman talagang bawal, maliban sa mga pagkain o gamot na maaaring dumaan sa gatas ng pagpapasuso at mapunta sa baby. Konsultahin ang iyong doktor sa mga ito.

Buntis ba ako? Posible bang buntis ako? Mga karaniwang tanong

Delayed ang aking period. Buntis ba ako?

Q1: doc .. itatanung ko lang po kung buntis ako? dahil apat na buwan na akong walang period. simula ng nag sex kami ng BF ko nung june 20, 2012 .. july hanggang ngayon wala pa din po akong period . hindi pa po ako gumagamit ng pregnancy test. Salamat po sa pag sagot.

Q2: delayed na po ako ng 2months buntis na po kaya ako doc?

Q3: Kapag 1 week kang delayed doc may posibilidad ba na buntis ako?

A: Pakiramdaman mo ang iyong katawan. May mga sintomas ka bang nararamdaman? Tingnan ang “Paano malaman kung buntis” na artikulo sa Kalusugan.PH upang malaman kung ano-ano ang mga sintomas na ito.

Kung hindi ka pa gumagamit pregnancy test, maganda kung gumamit ka na nito. Basahin ang “Gaanong kaaga pwedeng gamitin ang pregnancy test pagkatapos ng sex” upang malaman kung pwede ka na bang gumamit ng pregnancy test. Tingnan rin ang “Paano gamitin ang pregnancy test” na arikulo sa Kalusugan.PH upang malaman kung paano gumamit ng PT at paano basahin ang resulta nito.

Kung apat na buwan ka nang buntis, panahon na rin upang magpa-check up sa isang OB-GYN o midwife sapagkat dapat regular kang nagpapa-prenatal checkup. So ang payo ko sa’yo ay suriin agad ang iyong sarili sa mga sintomas, bilisang gumamit ng pregnancy test, at kung positive ito, magpatingin na kaagad sa doktor.

Pwede bang buntis kahit nagkakaron ng period after mag-sex?

Q1: Nagsex po kami ng BF ko nung sept. 14 pero nagkaron ako noong nakaraang buwan. Pero may tibok sa tyan ko. Posible bang buntis ako?

Q2: may posibilidad po bang buntis ako kahit ng mens po ako noong nakaraang buwan?

A: Regular ba ang pakiramdam mo nung huling regla po, o parang may kakaiba? Pwedeng magkaroon ng “spotting” isa o dalawang linggo pagkatapos mag-umpisa ang pagbubuntis o pagkatapos makipag-talik. Pero kung talagang regular kang dinatnan noong nakaraang buwan, e di malamang, hindi ka buntis at at pagtibok ng tiyan ay may ibang sanhi.

Para sigurado, bakit hindi ka gumamit ng pregnancy test? Para panatag ang loob mo. Tingnan ang “Paano gamitin ang pregnancy test” na arikulo sa Kalusugan.PH upang malaman kung paano gumamit ng PT at paano basahin ang resulta nito. Basahin rin ang “Gaanong kaaga pwedeng gamitin ang pregnancy test pagkatapos ng sex” para sa karagdagang kaalaman.

Q3: Ask kulang po doc last po kc nmin nagkaroon ng loving loving ng aswa ko ay noong sept 16,2012 den nagkaroon po ako ng mens noong sept 22,2012 pero po sa buong October until now sala pa po ako mens. Posible bang buntis ako?

A: Katulad rin sa mga naunang tanong, kung ‘spotting’ lang ang nangyari noong huli mong regla, o parang iba ito sa dati, ay posible paring buntis ka. Ang tanong ko sa iyo ay: May mga sintomas ng pagbubuntis ka bang nararamdaman? Magpa-pregnancy test ka na lang, at kung positive ito, magpatingin sa OB-GYN, doktor, o magpunta sa health center upang mabigyang-gabay.

Paano malaman kung buntis, kung irregular ang regla?

Q1: Doc, tanong ko lang po ako po ba ay buntis? gumamit naman po kami ng condom. 1week na po ang nakakalipas. Ireg po kasi ang regla ko. Yung ika 1st week po matapos ang aming pagtatalik nag kamens po ako. Hindi ko po alam kung regla po yon na nasabay sa 1stweek. Or ibang dahilan po yung pagdudugo. Parang regla naman po sya kung lumabas. Tapos po parang hindi po okay ang tyan ko. Tapos parang gusto ko po dumighay pero hindi po ako makadighay hindi ko po alam kung naduduwal ako o nadidighay. May posibilidad po kayang buntis ako?

Q2: Possible din ba na buntis pag dalawang beses dinatnan ng regla sa isang buwan; 1stweek at last week tapos 1st week ng month nung sumunod ng buwan?

A: Muli, ang pinakamabisang solusyon upang malaman kung buntis ka o hindi ay ang pag-gamit ng pregnancy test. Kung ikaw ay naka-miss ng pag-regla, o kung 21 na araw na ang nakalipas mula ng inyong pakikipagtalik, pwede ka nang magpa-pregnancy test. Ang paggamit ng condom, bagamat mabisang paraan ng family planning, ay pwede paring sumablay, halimbawa kung nabutas ito habang kayo ay nagsesex. Kung nakakaramdam ka ng mga sintomas, mas mabuti nang sigurado.

Posible parin bang maging buntis kahit negative ang pregnancy test?

Q1: 2weeks and 3days delayed na po hindi ako dinatnan..pero sa PT ko po doc.negative ang resulta..hanggang ngayon hindi pa ako dinatnan..pwede parin bang buntis ako doc?

A1: Oo, posible parin, lalo na kung ang pregnancy test na ginawa mo ay napaaga – halimbawa, kung ginawa mo bago ka datnan, o wala pang 14 na araw pagkatapos ng iyong huling pakikipagtalik. Pwede ring maging negatibo ang resulta ng pregnancy test kung naparami ang inom mo ng tubig bago mo ito ginawa, o hindi mo nasunod ng maayos ang mga instructions kung paano gumamit nito (tingnan ang artikulo sa Kalusugan.PH). Bakit hindi mo ulitin ang pergnancy test para makatiyak? Ito’y mas maganda kung gagawin sa umaga, pagka-gising.

Kung negative talaga, hindi lamang pagbubuntis ang pwedeng maging sanhi ng delayed na mens. May mga kondisyon gaya ng PCOS, at pag-inom ng ilang mga gamot, na pwedeng maging sanhi nito. Upang ma-examine ka ng maayos, magpatingin sa OB-GYN o ibang doktor upang matiyak kung ano bang sanhi nito, at upang masigurado kung buntis ka ba talaga o hindi.

Q2: hi doc, posible po ba na buntis ako kahit negative ang p.t ko? sabi po ng traditional hilot may heartbeat po ng baby sa loob ng tyan ko posible daw po nababalutan ang baby ko. Ang case ko po kasi nung feb. 2013 ngpapasmear and inject po ako, ang bisa po ay hanggang may 20 di na po ako nagpainject ulit kasi gusto na po ng hubby ko magkaanak at gusto ko na din… simula po nung nagpainject ako until now di po ako nagkakaron ng mens, pero before nung pills palang gamit ko regular ang mens ko. Tanong ko po ulit posible po ba na buntis na ako talaga.

A2: Posible parin naman kung napaaga ang pag-gamit mo ng pregnancy test o PT. Ulitin ito kapag 21 days na makalipas ang iyong pakikipagtalik. Isa pa, obserbahan mo ang katawan mo kung may mga sintomas ng pagbubuntis (basahin ang artikulong ito sa Kalusugan.PH). Kung wala ang mga ito at negative ang pregnancy test, tiyak na hindi ka buntis.

Kapag ba positive ang P.T., buntis na talaga?

Q: Doc kapag po ba POSITIVE ang P.T at ginamit ito ng wala pang isang linggo buntis po ba iyun? , mas mabuti po bang gamitin ang P.T kung ika 21 days ?

A: Kung positibo ang P.T., ito’y indikasyon na talagang buntis na ang babae, maliban na lang kung depektibo ang ginamit na pregnancy test, may iniinom na gamot ang babae gaya ng fertility treatment, o may ilang kondisyon gaya ng kyawa. Kung kayo ay regular na nagsesex, pwede rin naman na makasanhi ng pagbubuntis ay yung mga nauna nyo pang pakikipagtalik, kaya kahit wala pang 14-21 na araw mula sa inyong huling pakikipagsex ay positibo na kaagad. Isa pa, minsan kahit isang linggo pa lamang makatapos ang inyong pakikipagtalk ay pwede na talagang mag-umpisa ang pagbubuntis at maging positive angg P.T. Para sure, bakit hindi nyo na lang ulitin? Mahalaga na wasto ang iyong paggamit ng P.T. para makatiyak sa resulta nito. Basahin ang artikulong Paano gumagamit ng pregnancy test sa Kalusugan.PH.

Posible bang mabuntis kung nag-sex ng kakatapos lang ng regla?

Q: posible bang mabuntis ako dahil kakatapos lng ng regla ko nagsex kami ng asawa ko? tapos after a week nagkaroon ako ng regla pero one day lang?

A: Oo, posible. Isa sa mga unang senyales ng pagiging buntis ay ang pagkakaron ng ‘spotting’ na maaaring mapagkamalang regla kahit na wala ito sa oras, at hindi tumatagal ng isa o dalawang araw. Maaari kang gumamit ng pregnancy test 14 na araw pagkatapos ng pakikipagtalik o sa unang araw ng susunod dapat na monthly period kung ito’y hindi na dumating. Panigurado, pregnancy test na lang muna. Maging alerto rin sa mga iba’t ibang sintomas ng pagbubuntis. Kung mapag-alamang buntis, siguraduhing may gabay ng isang OB-GYN o iba pang doktor o midwife.

Maaari bang buntis kung nagkaroon ng mens?

Q: Maaari bang buntis kung nagkaroon ng regla?

A: Kung ito ay totoo at regular regla, hindi maaari. Subalit tandaan na ilang linggo pagkatapos mabuntis ang isang babae ay maaari siyang magkaron ng spotting – duduguin ang babae ngunit konti lamang kung ikokompara sa mens. Upang makatiyak, gumamit ng pregnancy test para malinawan kayo ng kapartner mo.

Paano kung positive ang P.T. pero wala namang sintomas?

Q: Nagkaroon po yung friend ko noong july 12 2013 tas ngayon aug. 12 hindi pa din sya nagkakaroon..nahihilab naman po yun puson nya at nag p.t naman siya positve po. Pano ba yun buntis na po ba yung friend ko na yun kahit wala naman sintomas ng pagbubuntis?

A: Kung positive ang pregnancy test, natigil na ang pagregla, at may mga pagbabago sa puson, malamang buntis na talaga. Tandaan na ang pagtigil ng regla at ang mga pakiramdam gaya ng paghilab ng tiyan ay mga sintomas na mismo ng pagbubuntis.

Ilang araw pagkatapos magsex pwedeng malaman kung buntis?

Q: Ilang days po malalaman na ang isang babae ay buntis?.Last September 8, 2014 my nangyari po samin ng boyfriend ko. Thank you po.

A: Ang unang senyales ay kung hindi ka datnan ng regla sa iyong kabuwanan. Kung irregular ka, pwede kang gumamit ng pregnancy test 21 na araw paktapos ng inyong pagtatalik.

Posible bang mabuntis kung nagtalik ng kakatapos lang ng monthly period?

Q: Doc matanong ko lang sept 15 dinugo ang girlfriend ko tapos nong sept 18 nagtalik kami…pagkatapos ilang weeks buntis sya..posible ba yun doc?

A: Kalimitan, ang pakikipag-sex ng walang proteksyon mula unang araw ng regla o menstruation hanggang ika-pitong araw pagkatos ng araw na ito ay maliit ang posibilidad na ang isang babae na nabuntis. Pero hindi may pag-aalinlangan, o kung hindi tiyak ang mga petsa, tanging ang paggamit ng pregnancy test ang siyang makakasagot kung buntis ba o hindi ang isang babae. Ito’y maaaring gamitin kung hindi dinatnan ang isang babae, o kaya 21 na araw pagkatapos makipagtalik sa mga irregular ang period.

MAGBASA PA: MGA SENYALES NG PAGBUBUNTIS AT PANGANGAK
Mga senyales ng una hanggang ikatlong buwan ng pagbubuntis
Mga senyales ng ika-apat hanggang ika-anim buwan ng pagbubuntis
Mga senyales ng ika-pito hanggang ika-siyam na buwan ng pagbubuntis
Mga senyales na malapit nang manganak

Anong epekto kung nadulas habang nagbubuntis?

Q: Ano po mangyayari s bby oag ndulas ang ngbubuntis?…ano po ang mgiging epekto?

A: Depende kung gaanong kagrabe ang pagkadulas, kung saan ito tumama, kung anung buwan na ng pagbubuntis, at marami pang ibang mga bagay. Marami namang mga babae na nadudulas o na-aaksidente habang sila’y buntis at wala namang itong naging epekto sa kanila o sa kanilang baby.

Dahil naka-balot sa tubig ang sanggol sa loob ng matris, ito’y may proteksyon sa pang-araw-araw na sitwasyon gaya ng pagkakasagi, pagkakadapa, at iba pa. Sa kabilang banda, may mga aksidente, gaya ng pagkadulas, na kung grabe talaga ay maaaring magdulot ng ‘premature delivery’ o panganganak ng wala sa oras. Regular na paghilab ng tiyan, na palakas ng lakas, ang siyang mararamdaman ng babae kung ito ay nangyayari.

Kung talagang grabe ito at talagang nadali ang matris ay maaaring maka-apekto mismo sa baby. Kung ito ay pinapangambahan, ang payo ko ay magpatingin sa iyong OB-GYN upang ma-examine nya ikaw at iyong baby para matiyak ang lagay nito.

Ang mga OB-GYN ay may mga iba’t ibang kagamitan, gaya ng ultrasound at tocometer, na maaari nilang gamitin upang makita ang kalalagayan ng baby sa loob ng matris.

Ano ang mga sintomas ng pagbubuntis?

Q: ano anu pa po ba ang mga sintomas ng pag bubutis?

A: May ilang mga artikulo dito sa Kalusugan.PH na maaaring makatulong sa iyong katanungan:

1. Paano Malaman Kung Buntis – Isang listahan ng mga iba’t ibang sintomas na naka-ayos ayon sa antas ng kasiguruhan na ang sintomas na ito na nangangahulugang buntis talaga ang babae.

2. Mga Karaniwang Sintomas ng Pagbubuntis – Ito ay mga karagdagang kaalaman tungkol sa mga karaniwang sintomas, na may kasamang payo o lunas sa ilan sa mga ito.

3. Pregnancy Test: Paano Gamitin at Basahin – Ang pinaka-tiyak parin na paraan upang masabing ikaw ay nagbubuntis ay ang pag-gamit ng pregnancy test. Basahin ang artikulong ito upang matuto ng wastong pag-gamit nito.

Sana ay makatulong ang mga artikulong ito sa iyo. Huwag mag-atubiling lumapit sa iyong doktor o sa health center na malapit sa inyo upang magabayan at regular na ma-check up kung sakaling ikaw ay buntis.