Tag-ulan na naman, at sa panahong ito, bukod sa pagdagsa ng ulan ay nariyan rin ang posibilidad na tayo’y madatnan ng mga iba’t ibang sakit na maaari namang maiwasan. Ang mga halimbawa nito ay ang cholera, na siyang na-ulat na dumadami ang kaso sa Pilipinas, ang leptospirosis na kaya nagdudulot ng sakit ay dahil sa tubig-baha, at iba pang mga karamdaman. Ating alamin ang ilang mga hakbang upang makaiwas sa sakit:

1. Siguraduhing ligtas ang pinagkukuhanan ng tubig. Ang ligtas na tubig ay napakahalaga para sa kalusugan. Tuwing tag-ulan, maaaring maapektuhan ang ating mga pinag-iigiban ng tubig, kaya’t dapat, maging segurista. Ang tubig na hindi tiyak ay dapat huwag ring gamitin na panghugas ng gulay, prutas na kakainin.

2. Pakuluan ang tubig na hindi sigurado. Kung hindi nakakatiyak sa kalidad ng inyong tubig, pakuluan ang tubig (dapat, kulong-kulo talaga) ng di kukulang na isang minuto. Bago magpakulo ng tubig, maaari ring salain ang tubig, at hayaan itong nasa lalagyan upang mahulog sa ibaba ang mga maliliit na sedimento. Basahin ang artikulong “Paano tiyaking malinis ang inuming tubig” sa Kalusugan.PH

3. Panatilihing wasto ang pagtapon ng dumi. Ang dumi ng tao ay isang pinagmumulan ng mga mikrobyong nagdadala ng cholera at iba pang sakit. Maaaring hindi ito problema para sa iba, ngunit sa panahon ng tag-ulan at tag-baha ay ito’y nagiging isang problema para sa marami. Dapat malayo sa mga pinagkukunan ng tubig gaya ng mga ilog, balon, at iba pa.

4. Iwasang magbabad sa tubig-baha. Ang sakit na leptospirosis ay dala ng mga mikrobyong galing sa mga daga at iba pang hayop, na maaaring dalhin ng tubig baha at makapasok sa balat ng tao. Kung mayroon kayong mga anak, pagbawalan silang maligo sa tubig baha. Alamin kung ano mga sintomas ng leptospirosis sa Kalusugan.PH at basahin ang mga kaalaman tungkol dito.

5. Huwag hayaang maipon sa mga lalagyan ay tubig na hindi gumagalaw o stagnant water. Ang mga tubig na naipon sa mga lalagyan ay maaaring maging lugar kung saan lumaganap ang mga lamok na syang nagdadadala ng dengue. Alamin kung paano maka-iwas sa dengue sa Kalusugan.PH

6. Magpatingin kaagad sa doktor kung may mga sintomas tulad ng di-mapigilang at/o malatubig na pagtatae, mataas na lagnat, pagsakit ng tiyan at ng katawan, upang maagapan ang anumang sakit na nakuha.