Q: Doc may diabetis kasi ang mommy ko, na hospital siya last August,tanong ko lang po ano ba ang mga pagkain n dapat at hindi dapat niya kainin at anung supplement ang kailangan niyang inumin para ma control or ma maintain ang kanya normal blood sugar. Kasi po hangang ngaun ng take parin siya ng insulin. maraming Salamat po. I am willing to wait for your response.
Kumain ng ayon sa Glycemic Index
A: Para sa mga may diabetes, ang mahalagang konsepto sa pagkain ay ang Glycemic Index, isang paraan upang sukatin ang abilidad ng mga pagkain na pataasin ang asukal sa dugo (blood sugar). May mga inihanda akong artikulo sa Kalusugan.PH na nagtatala ng mga karaniwang pagkain na mababa ang glycemic index (at dahil dito’y makakatulong sa mga may diabetes), at ang mga pagkain na mataas ang glycemic index at dapat iwasan o bawasan ng mga may diabetes. Ang mga artikulo ay narito:
Mga pagkain na mababa ang Glycemic Index
Mga pagkain na mataas sa Glycemic Index
Mga mahalagang prinsipyo ng pagkain
Para sa mga may diabetes, mahalaga na ang pagkain ay sapat lamang sa pangangailangan. Huwag kumain ng madami; kahit ang mga masusutansyang pagkain, kung napasobra, ay nakakasama. Damihan ang prutas at gulay, bawasan ang mga matataba at malalangis na pagkain; piliin ang bahagi ng karne na hindi mataba, at huwag kalimutang isama ang isda.
I-monitor ang asukal a dugo o blood sugar
Okay ba ang pagkain mo? Upang masubaybayan kung maayos ba ang pagkain, magandang magkaroon ng glucose monitor sa bahay, na nagsusukat ng antas ng asukal sa dugo sa pamamagitan ng isang maliit o portable na kagamitan. Tanungin ang iyong doktor kung paano ito gamitin at saan nakakabili ng ganito.
Ampalaya: Natural na pampababa ng asukal
Marami nang pag-aaral ang nagpapatunay na ang ampalaya (bitter gourd; Momordica charantia) ay may kakayahang magpababa ng blood sugar, at makatulong sa mga taong may diabetes. Subalit ito ay ‘supplementary’ lamang; ibig-sabihin, tulong lamang at hindi pwedeng humalili sa gamutan na inireseta ng doktor. Epektibo ba ang mga tableta ng ampalaya na inaalok sa mga botika? Wala ring patunay ang mga ito. Sa ngayon, ay ating masasabi lamang ay malaki ang posibilidad na may benepisyo ang ampalaya bilang bahagi ng pang-araw-araw na pagkain sa mga taong may diabetes. Kaya para sa mga tagapag-luto sa mga may diabetes, maghain kayo ng ampalaya – anumang luto – sa inyong mga ‘pasyente’.
