Heto ang ilan sa mga epektibong paraan para maka-iwas sa leptospirosis:

• Iwasang mabasa o malublob sa tubig-baha ang katawan, lalo na ang mga sugat
• Kung lulusong sa tubig-baha, gumamit ng botas at iba pang kagamitan
• Ang pagkakaron ng alipunga at galos sa paa ay maaaring magsilbing daan para makapasok ang leptospirosis sa katawan. Agapan ang alipunga (bisitahin ang artikulo).
• Pagbawalan ang mga anak na maglaro sa tubig-baha o anumang tubig na hindi dumadaloy
• Pagtibayin ang resistensya ng pamilya sa pamamagitan ng pagkain ng masustansya
• Magpatingin kaagad sa doktor kung may mga sintomas ng leptospirosis

Ang gamot sa leptospirosis – kung kompirmado nga talagang leptosprosis – ay gamutan ng antibiotics. Kumalat na sa balita na ang pag-inom ng Doxycycline ang karaniwang gamot, ngunit huwag itong basta-basta inumin! Matindi ang mga side effect nito sa iba’t ibang grupo gaya ng mga buntis at mga bata. Ang Doxycycline ay nangangailangan ng reseta; magpakonsulta muna sa doktor.

Huwag kalimutan ang ang gamot ay isang bahagi lamang ng gamutan; dapat gawin rin ang mga sumusunod:

• patuloy na pagkain ng masustansyang pagkain, gaya ng gulay at prutas
• pag-inom ng maraming tubig

May mga iba’t ibang laboratory test para malaman kung mayroon kang leptospirosis, subalit ang kinokonsidera ng mga doktor parin ay ang mga sintomas, lalong lalo na kung ang pasyente ay nakapaglakad sa tubig-baha.

Ang MAT o microscopic agglutination test ay isang pagsusuri sa laboratoryo na nakakatukoy kung talaga bang may leptospirosis.

Ang pagkuha ng blood urea nitrogen at creatinine sa pagsusuri ng dugo (blood chemistry) ay maaari ring makatulong.

Ang leptospirosis ay hindi agad ang epekto sa tao; ito’y nagpapamalas ng sintomas matapos lamang ang 4-14 na araw makalipas ang pagkabasa o pagkalublob sa tubig-baha.

Ang mga sintomas ng leptospirosis ay ang mga sumusunod:

Sa umpisa

• Parang tinatrangkaso
• Lagnat
• Panginginig
• Pananakit ng katawan (nangangalos)
• Panakakit ng kasukasuan
• Sakit sa ulo
• Pananakit ng tiyan
• pagsusuka
• pagtatae

Kung may komplikasyon

• Paninilaw ng katawan
• Mahapdi na pag-ihi
• Ihi na kulay-tsaa
• Kawalan ng ganang kumain
• Binabalisawsaw

Hindi pare-pareho ang sintomas ng leptospirosis; depende ito sa tao. Maraming katulad na sakit ang leptospirosis, gaya ng trangkaso, dengue fever, at iba pa, kaya mahalagang masuri ng doktor bago masabi na isang tao ay may leptospirosis.