Balitang Kalusugan: Regular na pag-inom ng kape, makabubuti sa puso

Pagpapabuti ng daloy ng dugo, at pagpapababa ng posibilidad ng pagbabara sa mga ugat, iyan ang sinasabing mabuting maidudulot ng pag-inom ng kape araw-araw. Ito ay ayon sa bagong pag-aaral na isinagawa ng mga batang siyentipiko sa bansang Korea.

kape

Ayon sa kanila, ang mga taong umiinom ng 3 hanggang 5 tasa ng kape bawat araw ay may mas mababang posibilidad ng pagkakaroon ng baradong coronary artery dulot ng namuong calcium sa loob ng mga ito. Ang coronary arteries ang siyang nagsusuplay ng dugo sa puso, kaya’t ang pagbabara nito ay tiyak na konektado sa pagkakaroon ng mga karamdaman sa puso.

Ang pag-aaaral na ito ay taliwas sa paniniwala noon na ang pagdaragdag ng caffeine sa katawan ay maaaring maka-kontribyut sa pagkakaroon ng sakit sa puso.

Ang pag-aaral ay isinagawa sa Kangbuk Samsung Hospital sa Seoul, South Korea  sa pamumuno ni Dr. Eliseo Guallar kung saan kumalap sila ng impormasyon sa 25,000 na katao na ang edad ay naglalaro sa 41 taong gulang.

Binantayan ang lebel ng calcium sa mga ugat ng mga rumesponde at napag-alaman na ang mga taong umiinom ng 3 hanggang 5 tasa ng kape bawat araw ay mas mababa ng 40 porsyento sa lebel ng calcium kung ikukumpara sa mga taong hindi uminom ng kape.

Bukod sa pag-aaral na ito, mayroon nang mga naunang ulat at pag-aaral na nagsasabi rin na may benepisyong maaaring makuha sa regular na pag-inom ng kape, ngunit sinasabing ang pag-aaral na isinagawa ni Dr. Guallar at mga kasama niya ang pinakamalaking pag-aaral sa relasyon ng kape at kalusugan ng puso.

Ano ang Caffeine at para saan ito?

Ano ang caffeine?

Ang caffeine ay isang karaniwang substansya na kadalasang sangkap ng iniinom na kape na may epektong nakakagising at nakakaalisto. Ito ang dahilan kung bakit ang kape ay paboritong iniinom ng marami sa atin lalo na umaga o kaya sa buong maghapon para manatiling produktibo sa mga gawain. Ito ay sapagkat ang caffein may kakayahang mag-stimulate sa Central Nervous System (CNS), sa puso, sa mga kalamnan at maging sa blood pressure.

May benepisyong medikal ba ang Caffeine?

Ayon sa mga pag-aaral, bukod sa pagkaalertong epekto ng caffeine, ito rin ay epektibo para maibsan ang anumang pananakit ng ulo, simpleng headache man o migraine. Kung titignan ang sangkap ng mga iniinom na gamot pang-tanggal ng sakit ng ulo, maaaring makita ang substansyang caffeine. Maaaring irekomenda ng doktor ang pag-inom ng caffeine kasabay ng pag-inom ng gamot na pain relievers gaya ng aspirin at acetaminophen.

Bukod sa kape, saan pa maaaring makuha ang caffeine?

Ang caffeine ay maaari ring makuha sa ibang inumin gaya ng tsaa, cola, mate at mga energy drink. May ilan ding mga multivitamins at food supplement na may sangkap na caffeine.

Gaano karaming Caffeine ang maaaring tanggapin ng katawan?

Hanggang 400 mg kada araw ang aprubadong dami ng caffeine na maaaring tanggapin ng isang taong nasa ganap na edad. Ito ay halos katumbas ng 4 na tasa ng kape, 10 lata ng cola, o dalawang inuman ng energy drink. Syempre, iba din ang dami na maaaring tanggapin ng mga bata at kabataan na hanggang 100 mg lamang kada araw. Ang anumang dami na hihigit dito ay maaaring makapagdulot ng side effects sa katawan.

Ano ang maaaring epekto ng sobrang Caffeine?

Ang sobrang caffeine sa isang araw ay maaaring magdulot ng ilang epekto sa katawan partikular sa nervous system at mga kalamnan. Kabilang dito ang sumusunod:

  • Insomnia o hirap sa pagtulog
  • Pagiging nerbyoso
  • Hindi mapakali
  • Pagiging iritable
  • Paghilab ng tiyan
  • Mabilis na pagtibok ng puso
  • Panginginig ng mga kalamnan