Kailan tumitigil ang pagtangkad ng tao?

December 4, 2014 by

Tuwing nalalapit na bagong taon, nauuso ang paniniwalang tatangkad pa kung makakatalon sa pagsapit ng alas-dose ng hating gabi. Ito ay para sa mga taong umaasa pa rin na madagdagan ang kanyang tangkad. Natural lamang ito sapagkat para sa mga Pilipino, ang pagiging matangkad ay isang magandang katangian. Para sa karamihan sa atin, “height does matter.” Ngunit kailan nga ba tumitigil sa pagtangkad ang isang tao at ano ang mga salik na makakaapekto sa kung gaano kataas ang maaaring itangkad ng isang indibidwal?

Gaano kataas ang isang karaniwang Pilipino?

Bago ang lahat, dapat muna nating malaman kung ano nga ba ang karaniwang taas ng isang Pilipino at Pilipina. Ayon sa mga pag-aaral ang karaniwang taas ng mga kalalakihan sa Pilipinas ay 163.5 cm o 5′ 4.4″ samantalang ang mga kababaihan naman ay 151.8 cm o 4′ 11.8″. Ang karaniwang taas na ito ay naapektohan ng ilang salik kung kaya’t mayroong mga taong likas na matangkad, at mayroon din naman likas na mababa.

Ano ang mga salik na makakaapekto sa pagtangkad ng mga tao?

Unang una, ang tangkad ng isang tao ay naapektohan ng genes na nananalaytay sa isang pamilya. May mga pamilya na likas na matatangkad, at mayroon din namang mga pamilya na bansot. Kung ang mga magulang mo ay parehong matangkad, hindi malayong mamana mo ang katangiang ito at lumaking matangkad din. Gayundin kung maliit ang iyong mga magulang, may posibilidad na ikaw rin ay maging maliit. Minsan naman, kahit maliit ang mga magulang, mayroon isang anak na naiiba at biniyayaan ng tangkad. Posible itong mangyari lalo na kung isa sa mga ninuno ng mga magulang ay matangkad rin.

Bukod sa salik na ang tangkad ay namamana, may ilan pang bagay na makaaapekto sa tangkad ng isang tao. Kabilang dito ang nutrisyon na nakukuha ng panahon ng pagbibinata o pagdadalaga kung saan pinakaaktibo ang pagtangkad ng isang tao. Sa panahong ito, dapat ay mataas at tuloy-tuloy ang nutrisyon na nakukuha ng katawan mula sa mga pagkain o kaya’y mga bitamina at food supplement sapagkat mataas ang pangangailangan ng tumatangkad na katawan sa mga ito. Makaaapekto rin ang mga karamdaman na maaaring maransan sa panahong ng pagdadalaga at pagbibinata. Maaaring agawin ng isang karamdaman ang nutrisyon na dapat ay para sa tumatangkad na katawan. May iba ding sakit gaya ng dwarfism na maaaring pumigil talaga sa pagtangkad ng tao. Ito ang dahilan kung bakit mayroong mga taong unano.

Posible bang mahulaan ang maaaring itangkad ng isang tao?

Ayon sa mga pediatrician o specialista sa mga bata, mayroong formula para mahulaan ang tangkad ng isang lumalaking bata.Bago ang lahat, dapat munang malamang ang tangkad ng ina at ama ng bata. Pagkatapos ay sagutin lamang ang sumusunod na formula:

  • Para sa mga kalalakihan: [(tangkad ng ina + 5 pulgada) + tangkad ng ama] hatiin sa dalawa
  • Para sa mga kababaihan: [(tangkad ng ama – 5 pulgada) + tangkad ng ina] hatiin sa dalawa

Ang magiging resulta ay maaring dagdagan o bawasan ng 2 pulgada, at maaring iyon ang pinal na tangkad ng isang bata pag-laki nya.

Kailan nagsisimula ang pagtangkad at kailan din ito tumitigil?

Ang pagsisimula ng pagtangkad ay naiiba para sa mga babae at lalaki. Sinasabing para sa mga babae, ang pagtangkad ay nagsisimula sa edad na 9-10 na taong gulang, habang sa mga lalaki naman ay sa edad na 11 na taong gulang. Pinaka aktibo ang pagtangkad sa edad na 11 o 12 sa mga kababaihan, habang sa edad na 13 naman sa mga kalalakihan. Humihinto naman ang pagtangkad na ito sa pagtatapos ng puberty stage. Nangyayari ito sa edad na 15-17 para sa mga babae, at 16-17 naman sa mga lalaki. Dapat tandaan na ang puberty sa bawat tao ay naiiba-iba depende sa kung gaano kataas ang mga lebel ng hormones sa katawan, maaring magsimula ito ng maaga at matapos din ng mas maaga, o kaya’y kabaligtaran.

Ano ang dapat gawin para lalo pang tumangkad?

Ang susi para mas lalo pang tumangkad ay ang pananatiling malusog ang katawan na may sapat na pahinga. Upang maging malusog, dapat ay kumpleto at sapat ang nutrisyon na nakukuha mula sa mga pagkain sa bawat araw at higit itong kailangan sa panahon ng puberty. Dapat ay kumpleto din ang tulog na hindi bababa sa 8 oras. Ang mga supplement at gamot na nagsasabing nakakatangkad ay walang garantiya na talagang makapagpapatangkad.

Filed Under: Buhay Sigla, Itanong kay Doc, Sa mga binata, Sa mga dalaga, Sa Pamilya Tagged With: , ,

Sobrang pagtangkad ng isang binata

August 21, 2013 by

Q: Hello po sana po masagot po nyo ang aking tanong. Maaari po bang ihinto ang pag tangkad ng isang lalaki? 6’4 na po kasi ako 17 palang po ako. Gusto ko na pong ihinto ang pag tangkad ko. Ma aari po ba yon? Masagot nyo po sana ito agad.

A: Kung ang iyong mga magulang at mga kapatid ay wala sa 6 feet ang tangkad at wala sa lahi ninyo ang pagiging matangkad, mahalagang magpatingin ka sa doktor dahil baka ang katawan mo ay labis ang produksyon ng growth hormone, ang hormone o kemikal na responsable sa paglaki at pagtangkad ng tao. Kinakailangan ng mga laboratory test upang malaman ang antas ng growth hormone sa iyong katawan. Kung ito ay mataas, may mga gamot na pwedeng inumin upang masupil ito. So ang sagot sa iyong tanong ay, oo, kung ang iyong pagiging matangkad ay dahil sa kasobrahan ng growth hormone, may paraan para dito.

Bukod sa mataas na antas ng growth hormone, may mga iba ring posibleng sanhi ng pagiging matangkad. Mas maganda kung ma-examine ka ng doktor upang matukoy nya ang mga posibilidad na ito. Kalimitin, ang mga lalaki ang tumatangkad pa hanggang edad 19-22 kaya mas maganda kung makapagpatingin ka sa lalong madaling panahon.

Filed Under: Itanong kay Doc, Sa mga binata Tagged With: , , ,

Ano ang gamot na pampatangkad?

May 20, 2013 by

Q: ano ang gamot pampatangkad?

A: Walang gamot na nakakapagpatangkad. Huwag maniwala sa mga patalastas na nangangako na nakakapatangkad sila. Ang height o tangkad ng isang tao ay maaaring resulta ng iba’t ibang mga bagay, gaya ng:

  • Genetics, o namamana sa iyong tatay at nanay. Kung babae ka, anong height ng iyong nanay at mga kamag-anak mo na babae sa magkabilang panig? Malaki ang posibilidad na ganon din ang maging height mo. Sa mga lalaki, ganon din. Tingnan ang mga kamag-anak na lalaki.
  • Wastong pagkain at tamang nutrisyon habang bata pa.
  • Pag-iwas sa sakit habang bata pa.
  • Pagiging masigla

Base sa ating mga nabanggit, walang papel ang mga tinaguriang ‘gamot’ na pampatangkad. Mas maganda kung ang perang gagamitin sa pagbili ng mga ito ay ilagay na lang sa pagbili ng mas masustansyang pagkain gaya ng mga prutas, gulay, at pagkain na wala masyadong sangkap na artipisyal gaya ng mga preservatives at artipisyal na flavoring.

Filed Under: Sa mga bata, Sa mga binata Tagged With: , , ,

Tatangkad pa ba ako sa edad kong 24?

November 8, 2012 by

Q: tatangkad pa ba ako sa edad kong 24?

A: Malamang, babae o lalaki ka man, hindi na. Tingnan ang artikulong “Tatangkad pa ba ako?” sa Kalusugan.PH para sa mga kaalaman tungkol sa pagtangkad.

Ayon sa naturang artikulo, ang “growth spurt” ay karaniwang dumarating sa edad 12-16, at ang pagtangkad ay patuloy hanggang edad 18 sa mga lalaki; at mas maaga pa sa mga babae. May konting pagtangkad parin (1-2 pulgada) na maaaring maganap hanggang edad 21-23. Sa mga edad na ito ay nagsasara na ang “growth plate” sa mga buto kaya hindi na maaaring tumangkad pa ng higit sa edad na ito.

Sana ito ay makatulong. Paalala lang, kung edad 24 ka na pataas, sarado na ang mga ‘growth plate’ sa buto; ibig-sabihin narating mo na ang pinaka-matangkad mong mararating. Huwag maniwala sa mga gamot o anumang paraan na pinapangakong magpapatangkad sa iyo.

Filed Under: Sa mga binata, Sa mga dalaga Tagged With: , ,

May pag-asa pa bang tumangkad ang 17-yr. old na babae?

October 2, 2012 by

Q: may pag asa pa po ba akong tumangkad 17 years old na po ako ? anu po bang mabisa pampatangkad para sa akin ?

A: Ang pagtangkad na nararanasan ng mga nagdadalaga (growth spurt) ay karaniwang nagtatapos sa edad 15-17 sa mga kababaihan. Bagamat may ilang mga kababaihang tumatangkad pa pagkatapos ng mga edad na ito, bahagya na lamang ito, at malamang, kung anong tangkad mo ngayon ay siya nang magiging tangkad mo bilang isang matanda.

May mga produktong sinasabing “pampatangkad” ngunit sa totoo, sa ngayon, walang anumang gamot o produktong napatunayan na talagang nakakapagpatangkad, at sa iyong edad, malamang ay wala nang magagawa ang mga ito. Ang tangkad ng isang babae ay naka-base sa iba’t ibang mga bagay gaya ng tangkad ng iyong mga magulang.

Ang average na tangkad ng mga kababaihang Pinay ay nasa 5’2 lamang ayon sa isang survey. Marahil ito’y nagbago na, subalit totoo parin na hindi talaga matangkad ang mga Pinoy kung ikokompara sa ibang mga lahi. Nawa ito’y hindi maging sanhi ng pagkabalisa o pagiging hindi kontento sapagkat hindi naman talaga mahalaga ang katangkaran sa totoong buhay.

Filed Under: Itanong kay Doc, Sa mga dalaga Tagged With: ,