Balitang Kalusugan: Regular na pag-inom ng kape, makabubuti sa puso

Pagpapabuti ng daloy ng dugo, at pagpapababa ng posibilidad ng pagbabara sa mga ugat, iyan ang sinasabing mabuting maidudulot ng pag-inom ng kape araw-araw. Ito ay ayon sa bagong pag-aaral na isinagawa ng mga batang siyentipiko sa bansang Korea.

kape

Ayon sa kanila, ang mga taong umiinom ng 3 hanggang 5 tasa ng kape bawat araw ay may mas mababang posibilidad ng pagkakaroon ng baradong coronary artery dulot ng namuong calcium sa loob ng mga ito. Ang coronary arteries ang siyang nagsusuplay ng dugo sa puso, kaya’t ang pagbabara nito ay tiyak na konektado sa pagkakaroon ng mga karamdaman sa puso.

Ang pag-aaaral na ito ay taliwas sa paniniwala noon na ang pagdaragdag ng caffeine sa katawan ay maaaring maka-kontribyut sa pagkakaroon ng sakit sa puso.

Ang pag-aaral ay isinagawa sa Kangbuk Samsung Hospital sa Seoul, South Korea  sa pamumuno ni Dr. Eliseo Guallar kung saan kumalap sila ng impormasyon sa 25,000 na katao na ang edad ay naglalaro sa 41 taong gulang.

Binantayan ang lebel ng calcium sa mga ugat ng mga rumesponde at napag-alaman na ang mga taong umiinom ng 3 hanggang 5 tasa ng kape bawat araw ay mas mababa ng 40 porsyento sa lebel ng calcium kung ikukumpara sa mga taong hindi uminom ng kape.

Bukod sa pag-aaral na ito, mayroon nang mga naunang ulat at pag-aaral na nagsasabi rin na may benepisyong maaaring makuha sa regular na pag-inom ng kape, ngunit sinasabing ang pag-aaral na isinagawa ni Dr. Guallar at mga kasama niya ang pinakamalaking pag-aaral sa relasyon ng kape at kalusugan ng puso.

Mga side effects ng pag-inom ng Cobra at iba pang energy drinks

Ang Cobra ay isang popular na brand ng energy drink na gustong gusto ng marami, mapa babae man o lalaki. Madalas itong nakikita sa mga poster sa gym at mga patalastas sa telebisyon na iniinom ng mga indibidwal na aktibong-aktibo sa mga sports at mga mabibigat na gawaing pisikal. Bilang pang-enganyo, sinasabi dito na mas mas tatagal daw ang lakas (endurance) sa mga pisikal na gawain at tiyak na mas magiging produktibo. Ngunit ano nga ba ang meron sa inuming ito at nakapagdudulot ng ganitong epekto? At ligtas nga ba talaga itong inumin?

Ano ang sangkap ng Cobra at iba pang mga energy drinks?

Gaya rin ng ibang brand ng energy drinks tulad ng Extra Joss, Lipovitan, Monster Energy, Red Bull, at Sting, ang panunahing sangkap ng mga inuming ito ay caffeine, isang substansyang kilalang sangkap ng kape na may epektong nakakagising at nakakapagpaalisto. Ngunit ‘di tulad ng caffeine na taglay ng kape, ang caffeine na taglay ng mga energy drinks ay masyadong mataas. Bukod pa rito, taglay din ng mga inuming ito ang mataas na lebel ng asukal, taurine, ginseng, guarana, at ilang mga bitamina—mga sangkap na maaaring may benepisyo ngunit maaaring magdulot ng panganib sakatawan kung mapapasobra, lalo pa’t ang mga inuming ito na malayang binebenta sa mga pamilihin ay walang kontrol.

May panganib ba ang pag-inom ng mga energy drinks?

Ayon sa isang pag-aaral na isinagawa ng World Health Organization noong taong 2014, ang mga energy drinks daw ay may potensyal na magdulot ng panganib sa kalusugan ng umiinom na publiko lalo na sa mga mapag-eksperimento na inihahalo pa ang inuming ito sa mga alak. Sinasabing ang sobrang pag-inom ng mga energy drinks ay maaaring magdulot ng mga sumusunod na epekto:

  • pagka-overdose sa caffeine na maaaring magdulot ng mga sintomas gaya ng altapresyon, mabilis na tibok ng puso, pagsusuka, pagkokombulsyon, at maging pagkamatay
  • pagkakaroon ng Type 2 Diabetes dahil pa rin sa sobrang caffeine na nakaaapekto sa insulin ng katawan.
  • pagkalaglag ng bata sa mga nagbubuntis
  • dehydration
  • problema sa pag-iisip at sirkulasyon ng dugo sa katawan
  • pagiging dependent pag-inom nito
  • problema sa mga ngipin
  • sobrang timbang

Isa pang ikinababahala ng mga alagad ng medisina ay ang paghahalo ng ilan sa mga energy drink at alak. Ito ay delikado at maaring magdulot ng problema sa pag-iisip na maaring humantong sa ilang padalos-dalos na pagdedesisyon at pagkawala sa sarili.

Ano ang mas mabuting gawin upang makakuha ng karagdagang lakas?

Payo ng mga eksperto, may mga gawain at pagkaing mas mabuting mapagkukunan ng lakas kaysa sa pag-inom ng mga energy drinks. Kabilang dito ang pagkain ng balanse at masusustansya, regular na ehersisyo, at sapat na tulog. Kung nanaisin naman ang agarang lakas, mas mabuti pa ang pag-inom ng kape at soy milk. Makatutulong din ang pagkain ng mga prutas o pag-inom ng masustansyang katas nito, pagkain ng mga gulay at whole grain na tinapay.