Mga kaalaman tungkol sa Zika virus

January 27, 2016 by

brazil-zika-birth-defects_b887e1f6-b446-11e5-9860-1d91036943d1Isang virus na kumakalat sa North at South America ang Zika virus. Ito’y kinakabahala ng mga awtoriddad sapagkat ito’y naiugnay sa mga komplikasyon sa pagbubuntis gaya ng microcephaly o pagiging maliit ng ulo ng sanggol na bagong panganak.

Heto ang mga mahalagang kaalaman tungkol sa virus na ito:

Ano ang Zika Virus disease (Zika)?

Ang Zika ay isang sakit na dulot ng Zika virus, isang virus na hatid ng isang uri ng lamok (Aedes).

Ano ang mga sintomas ng Zika?

Ang mga sintomas ng Zika ay lagnat, rashes, pananakit ng kasukasuan, at pamumula ng mata na parang sore eyes. Ang mga sintomas na ito ay karaniwang tumatagal ng ilang araw hanggang isang linggo.

Mahalagang tandaan na ang mga sintomas ng Zika ay kagaya rin ng ibang mga virus na dala ng lamok gaya ng dengue, at maaari rin itong mapagkalamang trangkaso.

Isa pa, maliit na porsyento lamang ng mga tao na na-impeksyon ng virus ang magkakaron ng mga sintomas; maaaring magkaron ng Zika virus ng hindi nalalaman.

Paano nahahawa o nakukuha ang Zika virus?

Gaya ng dengue, ito’y nakukuha sa kagat ng lamok na may taglay na Zika virus. Ang mga sintomas ay kadalasang lumalabas pagkatapos ng 2 hanggang 7 mula sa pagkakakagat ng lamok. Maaari ring mahawa ng isang buntis ang kanyang dinadalang sanggol.

Anong mga bansa o lugar ang may Zika virus?

Ayon sa CDC ng Estadios Unidos, ang Zika ay matatagpuan sa mga bansa sa South America gaya ng Brazil, Bolivia, Cape Verde, Columbia, Paraguay, Venezuela, at iba pa.

Paano makakaiwas sa Zika virus?

Kung nakatira ka o magbabyahe ka sa ibang bansa, alamin kung may Zika virus sa bansang ito at kung saan ito matatagpuan. Iwasan ang mga lugar na ito, o kung kailangan mong talagang magpunta, gumamit ng insect repellant para makaiwas sa mga lamok.

Filed Under: OFW Corner

Kaalaman tungkol sa urinalysis o pagsusuri sa ihi

August 18, 2015 by

Ano ang urinalysis at para saaan ito?

Ang pagsusuri sa ihi o urinalysis ay isang pamamaraang medikal kung saan sinusuri at pinag-aaralan sa laboratoryo ang ihi ng tao. Ito ay mabisang paraan ng pagtukoy sa maraming uri ng sakit na nararanasan ng isang indibidwal. Dito’y ineeksamin ang anyo, kulay, konsentrasyon, at mga kemikal na bumubuo sa ihi. Anumang abnormalidad o kaibahan sa normal na bilang at sukat ay maaring mangahulugan ng karamdaman o kondisyon sa katawan.

Kanino at kailan isinasagawa ang urinalysis?

Maaaring isagawa ang pagsusuri sa ihi sa kahit na sinong tao lalo na kung may rekomendasyon ng doktor. Maaaring ito ay para matukoy ang sanhi ng nararanasang sintomas o abnormalidad sa katawan, o kaya naman ay para lamang makasiguro na ang katawan ay nasa normal na kondisyon. Mahalaga rin ang urinalysis sa pagmomonitor ng mga kaganapan sa katawan. Bukod sa mga nabanggit, maari din isagawa ang urinalysis para matukoy ang pagbubuntis ng isang babae, o sa pagsasagawa ng drug screening.

Paano isinasagawa ang urinalysis?

Ang pagkolekta sa ihi na gagamitin sa pagsusuri ay maaaring isagawa sa bahay o kaya sa klinika ng sumusuring doktor. Ang ihi na inilalagay sa isang plastic na lalagyan na bigay ng doktor ay ipapadala sa laboratoryo upang doon pag-aralan. Ang ihi ay maaaring haluan ng ilang kemikal, silipin sa ilalim ng microscope, at isailalim pa sa ilang mga pamamaraan.

Anu-ano ang mga tinitignan sa urinalysis?

Ang karaniwang pagsusuri ng ihi na ginagawa sa laboratoryo ay maaaring makapagbigay ng resulta gaya ng sumusunod:

  • Acidity (pH). Isa sa mga tinitignan sa sinusuring ihi ay ang acidity nito. Ang abnormalidad sa acidity ng ihi ay maaaring mangahulugan ng problema sa bato o sa daluyan ng ihi.
  • Concentration. Tinitignan din ang konsentrasyon ng ihi upang matukoy kung sapat ang tubig na tinatanggap ng katawan sa araw-araw.
  • Protein. Tinitignan din ang lebel ng protina sa ihi. Ang mababang lebel nito ay nangangahulugang normal lamang, habang ang pagtaas sa lebel ng protina ay maaaring mangahulugang may problema sa bato.
  • Sugar. Ang normal na ihi ay kadalasang hindi namang nakikitaan ng asukal. Ngunit kung mayroong asukal sa ihi, maaaring mangailangan ng follow-up check up para sa diabetes.
  • Ketones. Ang pagkakaroon din ng ketones sa ihi ay maaaring mangahulugan ng diabetes.
  • Bilirubin. Ang pagkakaroon naman ng bilirubin sa ihi ay senyales ng pagkakaroon ng sakit sa atay.
  • Impeksyon. Maaaring masilip din sa ihi ang ilang ebidensya ng impeksyon sa daluyan ng ihi (UTI) gaya ng white blood cells
  • Dugo. Ang pagkakaroon naman ng dugo sa ihi ay nangangahulugan ng problema sa bato o pantog.

Gaano katagal bago makuha ang resulta ng urinalysis?

Ang resulta ng urinalysis ay karaniwang nakukuha isang araw pagkatapos maipasa sa laboratoryo ang sample ng ihi. Ngunit sa ibang pagkakataon lalo na kung kinakailangan ang agarang resulta ng pagsusuri, maaring makuha ang resulta pagkatapos lamang ng ilang oras.

Ano ang mga sakit na maaaring matukoy sa pamamagitan ng urinalysis?

Ang pagsusuri ng ihi ay hindi naman nakapagbibigay ng siguradong diagnosis, bagkus nagbibigay lamang ng paunang mga ebidensya para sa sakit. Ang mga ebidensyang ito naman ang pagbabasehan ng doktor kung kakailanganin pa ang karagdagan pagsusuri o follow-up check up. Sa tulong ng urinalysis, maaaring masilip ang pagkakaroon ang paunang ebidensya ng pagkakaroon ng karamdaman o kondisyon sa bato at daluyan ng ihi gaya ng UTI, kidney stones, kanser sa bato at pantog, at iba pa. Maaari din itong makapagbigay ng ebidensya sa sakit na diabetes, at sakit sa atay. Ang pagkumpirma sa pagbubuntis at paggamit sa ipinagbabawal na gamot ay natutukoy din gamit ang urinalysis.

May epekto ba sa katawan ang urinalysis?

Dahil ang ihi na ginagamit sa pagsusuri ay madali namang nakukuha nang walang aparato na ipinapasok o itinutusok sa katawan, o kaya ay gamot na pinapainom sa pasyente, kadalasan ay wala namang epekto sa kalusugan ang pamamaraang ito.

Filed Under: Ang Laboratorio, Gabay Kalusugan

Balitang Kalusugan: Suporta sa pagpapa-dialysis, mas pinahaba pa ng PhilHealth

June 26, 2015 by

Mula sa 45 na araw, pinahaba sa 90 na araw ng Philippine Health Insurance Corporation o PhilHealth ang suporta nito sa mga miyembro na nagpapa-dialysis kada taon. Layon ng PhilHealth na mabawasan pa ang gastusin ng mga Pilipino sumasailalim sa ganitong klase ng gamutan.

Ang pagpapahaba sa panahon na sakop ng tulong ng PhilHealth ay dahil umano sa patuloy na tumataas na bilang ng mga miyembro nito na may karamdaman sa bato at sumasailalim sa pagpapadialysis. Lumalabas kasi na ang pagpapa-dialysis ang may pinakamataas na bilang na tulong na naibigay ng PhilHealth sa mga miyembro nito sa nakalipas na taon.

Ngunit sa kabila ng pagpapahaba ng panahon na sakop ng tulong ng PhilHealth sa mga miyembro na nagpapa-dialysis, ibababa naman sa P2,500, mula sa orihinal na P4,000 kada session, ang tulong pinansyal ng ahensya sa mga ito. Ito naman daw ay sapat na para sagutin ang bayad sa doktor at sa makinang ginagamit sa pagpapadialysis.

Ang mga miyembro ng PhilHealth ay maaaring lumapit saanmang ospital at dialysis center na accredited ng PHilHealth sa buong bansa upang magamit ang benepisyong ito.

Filed Under: Balitang Kalusugan, Balitang Pambansa, Gabay Kalusugan, Gabay Philhealth

Balitang Kalusugan: Z Package Benefits ng PhilHealth, bubuksan na rin sa mga Pribadong Ospital

June 26, 2015 by

Upang mas mapalawak ang pangangalagang pangkalusugan sa lahat ng mga Pilipino, inanunsyo ng Philippine Health Insurance Corporation (PhilHealth) na tumatanggap na sila ng aplikasyon mula sa mga pribadong ospital na nagnanais ng suporta para sa mga serbisyong sakop ng kanilang Z benefits package.

Ang Z benefit package ay tumutukoy sa benepisyong tutugon sa ilang malulubhang karamdaman na nararanasan ng mga Pilipino. Kabilang dito ang paggagamot sa ilang mga sakit gaya ng breast at prostate kanser, acute lymphocytic leukemia, ventricular septal defect, tetralogy of the fallot, coronary artery bypass graft, ilang mga piling operasyon sa buto, at iba pa. Kung sa una’y bukas lamang ang pagkuha sa benepisyong ito sa ilang ospital ng gobyerno sa buong bansa, ngayon ay iniimbitahan na rin ng PhilHealth ang mga pribadong ospital.

Sa mga pribadong ospital na nagnanais na makipag-ugnayan sa PhilHealth ukol sa benepisyong ito, kakailanganin lamang na magpadala ng Letter of Intent (LOI) na may pirma ng direktor ng pagamutan, at dapat ding tiyak na maibibigay ng ospital ang serbisyong pangkalusugan na sakop ng Z benefit.

Sa ngayon ay may 17 na pagamutan ang tumatanggap sa 11 na uri ng Z benefit package, at layon ngayon ng PhilHealth na madagdagan pa ito para mas maabot pa ang mas maraming mga Pilipino.

Filed Under: Balitang Kalusugan, Balitang Pambansa, Gabay Kalusugan, Gabay Philhealth

Benepisyo ng mabuting Family Planning at Kontrasepsyon

June 3, 2015 by

Ang Pilipinas ang isa sa mga bansang may mataas na bilang ng populasyon. Sa nakalipas na taong 2014, lumampas sa 100 milyon ang bilang ng mga Pilipino. Kaya naman, hindi katakataka na naisabatas na sa wakas ang kontrobersyal na Reproductive Health Law na naglalayong kontrolin ang patuloy na pagtaas ng bilang ng populasyon sa bansa. Isa sa mga mabubuting nilalaman ng mahalagang batas na ito ay ang pagtatalakay ng Family Planning sa mga Pilipino, lalo na sa mga naghihirap at patuloy na lumalaking pamilya.

Ang Family Planning ay tumutukoy sa pagdedesisyon ng mag-asawa sa pagbuo ng kanilang pamilya. Dito’y maaaring pagplanuhan nila ang bilang ng kanilang magiging anak, pati na ang agwat sa pagitan ng kanilang magiging mga anak. Siyempre, malaki ang papel ng paggamit ng iba’t ibang pamamaraan upang mapigilan ang pagbubuntis (contraception) upang maisakatuparan ito.

Benepisyo ng Family Planning at Kontrasepsyon

Ang mabuting pagpaplano ng pamilya ay makatutulong hindi lamang sa ikabubuti ng kalagayan ng kababaihan kundi pati na rin sa pag-unlad ng kanyang pamilya. Kaya’t mahalaga na mabigyan ang mga magkapareha ng nararapat at ligtas na paraan ng kontrasepsyon. Narito ang mga benepisyong hatid ng mahusay at epektibong pagpaplano sa mga pamilya:

Mas mababang panganib sa kalusugan sa pagbubuntis ng mga kababaihan

Direktang makaaapekto sa kalusugan ng isang babae kung magkakaroon siya ng pagkakataon na pumili at magdesisyon kung kailan siya mabubuntis. Maiiwasan ang ‘di inaasahang pagbubuntis pati na ang padalos-dalos na desisyon ng delikadong pagpapalaglag ng bata.

Ayon pa sa pag-aaral, ang pagkakaroon ng higit sa 4 na anak ay maaaring mangahulugan ng mas mataas na panganib sa kalusugan ng nagbubuntis na ina.

Mas mababang kamatayan ng mga sanggol

Sa Pilipinas, isa sa sampung pangunahing dahilan ng pagkamatay ay sa mga bagong silang na sanggol. Ang ganitong problema ay maaaring masolusyonan sa pamamagitan ng mahusay na pagpapalano sa pamilya. Ang paglalagay ng sapat na panahon sa pagitan ng pagbuo ng bawat anak ay makatutulong nang malaki sa pag-iwas sa kamatayan ng mga sanggol.

Pag-iwas sa pagkalat ng HIV/AIDS

Ang paggamit ng proteksyon sa pakikipagtalik ay malaking hakbang upang maiwasan ang pagkalat ng nakahahawang sakit na HIV/AIDS. Sa tulong nito, mas mapapababa ang bilang ng mga sanggol na ulila sa magulang at mga sanggol na apektado ng sakit.

Pagbaba ng bilang ng maagang pagbubuntis

Ang mga kabataan ay likas na mapusok at handang subukan ang lahat ng bagay sa mundo maging ang pakikipagtalik. Bunga nito, nagkakaroon ng “teenage pregnancies” na hindi mabuti para sa kalusugan ng bata. Ang mga sanggol na isinilang ng mga batang ina ay kadalsang may mas mababang timbang at may mas mataas na panganib ng pagkamatay sa kapanganakan. Bukod pa rito, maaaring kailanganing ipagpaliban din ang pag-aaral ng batang ina, at maapektohan pa ang  kalagayan niya sa lipunan.

Pagbagal ng paglago ng populasyon

Ang bilang ng populasyon ay nakaaapekto sa ekonomiya, kapaligiran, ang pangkabuuang pag-unlad ng isang bansa. At ang susi upang makontrol ang paglago ng populasyon ng isang bansa ay ang pagpapatupad ng mahusay na pagpaplano sa pagbuo ng mga pamilya.

 

 

 

Filed Under: Gabay Kalusugan, Kalusugan sa Pilipinas Tagged With:

10 Tips upang makatipid ng gastos sa ospital

May 29, 2015 by

Sa panahon ngayon, mahal ang magkasakit, lalo na kung kakailanganing dalhin at i-confine sa ospital ang pasyente. Maliit na ang 20 libo na gastos para sa ilang gabi sa murang ospital, habang maaari namang lumampas ng 100 libo ang gastusan kung ang kondisyon ay malubha at nasa mamahaling ospital.

ospital

Sa hirap ng buhay ngayon, ang anumang paraan ng pagtitipid ay tiyak na makatutulong. Kaya naman, narito ang 10 tips na tiyak na makatutulog sa pagtitipid sa gastos sa ospita:

1. Gamitin ang health card at iba pang segurong pangkalusugan

Alamin kung ang ospital na papasukin ay accredited ng health card o anumang seguro upang makatipid. Ang mga health card at segurong pangkalusugan (health insurance) ay makatutulong nang malaki sa kabawasan ng gastusin sa ospital. Maaari nitong sagutin ang malaking porsyento ng gastos sa ospital, mula sa mga hospital fees hanggang sa professional fee sa doktor. Ang PhilHealth ay isang halimbawa ng segurong pangkalusugan na itinalaga ng gobyerno upang magbigay ng murang seguro.

Basahin ang mga benepisyon makukuha sa pagiging miyembro ng Philhealth: Benepisyo ng Philhealth.

2. Lumapit sa mga pang-gobyernong ospital at pagamutan

Kung ang kondisyon ay makapaghihintay naman at maaaring pagtiyagaan, pumila na lamang sa mga pampublikong ospital na hawak ng gobyerno. Ang mga ospital na ito ay kadalasang nangangailangan lamang ng paunang bayad na maliit lamang, habang ang bayad sa doktor ay sagot na ng gobyerno. Ang tanging gagastusin na lamang ay ang pagbili ng mga iniresetang gamot at mga materyales na kakailanganin sa paggagamot. Sa Maynila, nariyan ang Jose Reyes Memorial Medical Center, Philippine General Hospital, Dr Jose Fabella Memorial Hospital, San Lazaro Hospital, at marami pang iba.

Alamin kung saang ospital pinakamalapit: Listahan ng mga ospital sa Pilipinas.

3. Dumulog sa mga institusyon na nagbibigay ng tulong pampinansyal

Mayroon ding mga institusyon sa bansa na nagbibigay ng tulong pampinansyal sa mga taong kulang ang pambayad sa ospital. Kadalasan ay humihingi lamang ng kasulatan na nagsasaad ng pangangailan, at ilan pang requirements na itinalaga ng institusyon. Halimbawa ng institusyong maaaring dulugan para sa ganitong pangangailangan ay ang Philippine Charity Sweepstakes Office (PCSO).

4. Piliin ang mas murang kuwarto sa ospital

Kung walang sapat na pambayad sa ospital, mabuting piliin na lamang ang mas maliit na kuwarto ng ospital, o di kaya’y murang ward sa ospital. May ilang mga ospital din na mayroong charity ward o maliliit na kuwarto na walang aircon na tiyak na mas mura din kung ikukumpara sa pribadong kuwarto ng ospital. Malaki ang matitipid sa gastusin sa ganitong paraan na maaaring umabot lamang sa kalahati ng bayarin ng pasyenteng gumamit ng pribadong kuwarto sa ospital.

5. Magtanong kung maaari ang mas murang paggagamot

Huwag mahihiyang magtanong sa doktor kung mayroong mas murang paraan ng paggagamot, partikular sa pagbili ng mga iniresetang gamot. Alamin kung maaari ang generic na gamot upang mas makatipid.

6. Gamitin ang mga diskuwentong nakatalaga para sa pasyente

Huwag kalilimutang magdala ng ID kung ang pasyente ay senior citizen. Itinalaga kasi ng batas ang 20% na diskuwento para sa matatanda. Sayang naman ang diskuwento kung hindi ito magagamit.

7. Magkaroon ng doktor para sa buong pamilya (family doctor)

Ang pagkakaroon ng doktor para sa buong pamilya ay isa ring malaking tulong upang makatipid sa gastusin. Kung ang doktor ay kaibigan na ng pamilya, hindi malayong makakuha ng diskuwento sa pambayad sa doktor. Maaari ding makakuha ng mahusay na rekomendasyon para sa ibang doktor na epesyalista sa ibang larangan.

8. Itabi ang lahat ng resulta ng mga pagsusuri

Ipunin ang lahat ng dokumento at resulta ng pagsusuri sa ospital. Ilagay ito sa isang folder at hiwag iwawaglit. Makatutulong ito sa pagtitipid sa gastos upang hindi na maulit ang ibang pagsusuring nauna nang isinagawa.

9. Ugaliin ang regular na pagpapa-check-up

Maging maagap sa sariling kalusugan. Regular na magpatingin sa doktor ng kahit 1 beses sa isang taon. Sa pamamagitan nito, maaaring matukoy ang sakit habang maaga pa at maiwasan ang mas mahal na gastusin sa ospital.

Basahin ang kahalagahan ng regular na pagpapatingin sa doktor: Kahalagahan ng regular na pagpapacheck-up.

10. Umiwas sa lahat ng bisyo at mga gawaing maaaring makasama sa kalusugan.

Ang malusog na pamumuhay at pag-iwas sa mga bisyo na maaaring pagmulan ng mga sakit ay mabisang paraan din ng paggiging maagap sa mahal na gastusin sa ospital. Kung mapapanatiling malusog ang pangangatawan at malayo sa anumang sakit, hindi na kakailanganin pang gumastos sa ospital.

 

Filed Under: Gabay Kalusugan, Gabay Ospital, Itanong kay Doc Tagged With: ,

Kahalagahan ng Newborn Screening

April 16, 2015 by

Ang newborn screening ay isang simple ngunit mahalagang pamamaraan na isinasagawa sa mga bagong silang na sanggol upang makita kung mayroong sakit o anumang kondisyon na kinakailangang gamutin. Sa tulong nito, maaring maagapan ang ilang mga sakit na nakukuha sa kapanganakan at maging ang kamatayan sa mga bagong silang na sanggol (neonatal death) na isa sa sampung pangunahing dahilan ng kamatayan sa bansa.

Layunin ng pamamaraang ito na mabigyan ng normal na pamumuhay ang lahat ng bagong silang na sanggol at matiyak na maaabot ang kabuuang potensyal ng bata.

newborn screening

Paano isinasagawa ng Newborn Screening?

Sa tulong ng newborn screening na isinasagawa sa mga ospital at mga lugar panganakan, maaaring matukoy ang sakit at agad itong malunasan. Isinasagawa ito sa pamamagitan ng sumusunod na hakbang:

1. Ang screening sa bagong silang na sanggol ay isinasagawa sa loob ng 48 na oras mula nang mainanganak ang bata, o kaya ay sa loob ng 24 oras ngunit hindi sa pagkalipas ng 3 araw. Kung ang sanggol ay itinalaga sa Intensive Care Unit ng ospital, maaaring hindi agad suriin at palipasin ang 3 araw, ngunit dapat pa ring isailalim sa screening sa pag-apak nito sa edad na 7 araw.

2. Tintutusok ang sakong ng bata at dito’y kumukuha ng ilang patak ng dugo.

3. Ang nakuhang dugo ay inilalagay sa isang espesyal na uri ng card at pinapatuyo nang apat na oras.

4. Ang newborn screening ay maaaring isagawa ng nurse, doctor, komadrona, o medical technologist sa ospital o lugar panganakan.

5. Kung sakaling magpositibo sa anumang kondisyon ang inisyal na screening, maaaring ipasa ang kaso sa mga doktor upang agad na mabigyan ng lunas.

 

Filed Under: Ang Laboratorio, Buhay Sigla, Gabay Kalusugan, Prebensyon at Pag-iwas, Sa mga bata, Sa Pamilya Tagged With: , ,

Mga Sakit na Sakop ng PhilHealth

March 3, 2015 by

Isa sa mga benepisyong matatanggap ng bawat miyembro ng PhilHealth na may sapat na kontribusyon ay ang pagsagot ng ahenysa sa ilang mga gastusin sa ospital, kabilang na ang mga hospital charges at professional fee ng doktor. Sinasagot din ng PhilHealth ang ilang mga sakit at karamdaman, at mga medikal na pamamaraan na kabilang sa All Case Rates ng PhilHealth. Ang All Case Rates ay ang mga itinakdang presyo para sa mga kondisyon at pamamaraang medikal na ibinabawas ng PhilHealth sa total bill ng pasyenteng miyembro o benepisyaryo ng ahensya.

All Case Rates ng PhilHealth

Ang ilang mga sakit at kondisyon na sakop ng PhilHealth sa pamamagitan ng All Case Rates ay ang sumusunod:

  • Dengue I (Dengue Fever and DHF Grades I & II) – P8,000
  • Dengue II (DHF Grades III & IV) – P16,000
  • Pneumonia I (Moderate Risk) – P15,000
  • Pneumonia II (High Risk) – P32,000
  • Essential Hypertension – P9,000
  • Cerebral Infarction (CVA I) – P28,000
  • Cerebro-Vascular Accident (Hemorrhage) (CVA II) – P38,000
  • Acute Gastroenteritis (AGE) – P6,000
  • Asthma – P9,000
  • Typhoid Fever – P14,000
  • Newborn care package in hospitals and lying-in clinics – P1,750

Para sa kabuuang listahan ng mga sakit at kondisyon, at presyo ng mga ito, maaaring tignan ang Medical Case Rates sa website ng PhilHealth.

Sagot din ng PhilHealth ang ilang mga pamamaraang medikal (medical procedures) na isinasagawa sa ospital. At gaya rin ng mga sakit na sagot ng PhilHealth, ang mga pamamaraang medikal ay nakatala rin sa All Case Rates. Narito ang ilan sa mga pamamaraan na sakop ng PhilHealth sa pamamagitan ng All Case Rates:

  • Radiotherapy – P3,000
  • Hemodialysis – P4,000
  • Maternity Care Package – P8,000
    • Normal Spontaneous Delivery in Level 1 Hospital – P8,000
    • Normal Spontaneous Delivery in Level 2-4 Hospitals – P6,500
  • Caesarean Section – P19,000
  • Appendectomy – P24,000
  • Cholecystectomy – P31,000
  • Dilation and Curettage – P11,00
  • Thyroidectomy – P31,000
  • Herniorraphy – P21,000
  • Masectomy – P22,000
  • Hysterectomy – P30,000
  • Cataract Surgery – P16,000

Ang kabuuang listahan ng mga sakit at kondisyon, at presyo ng mga ito, maaaring tignan ang Prcedure Case Rates sa website ng PhilHealth.

Z Benefits

Bukod sa mga sakit at pamamaraang medikal na sakop ng All Case Rates, tinutugunan din ng PhilHealth ang gastusin ng mga pasyenteng dumaranas ng malulubhang sakit na nangangailangan ng matinding gastusan. Ang mga ito ay sakop naman ng Z Benefits ng PhilHealth. Kabilang dito ang sumusunod:

  • Acute Lymphocytic / Lymphoblastic Leukemia (standard risk) – P210,000
  • Breast Cancer (stage 0 to IIIA) – P100,000
  • Prostate Cancer (low to intermediate risk) – P100,000
  • End-state renal disease eligible for requiring kidney transplantation (low risk) – P600,000
  • Coronary Artery Bypass Graft Surgery (standard risk) – P550,000
  • Surgery for Tetralogy of Fallot in Children – P320,000
  • Surgery for Ventricular Septal Defect in Children – P250,000
  • Cervical Cancer: Chemoradiation with Cobalt and Brachytherapy (low dose) or Primary surgery for Stage IA1, IA2 – IIA1 – P120,000
  • Cervical Cancer: Chemoradiation with Linear Accelerator and Brachytherapy (high dose) – P175,000
  • Z MORPH (Mobility, Orthosis, Rehabilitation, Prosthesis Help) – first right and/or left below the knee – P15,000; both limbs – P30,000
  • Implants for Hip Arthroplasty: Implants Hip Prosthesis, cemented – P103,400
  • Implants for Hip Arthroplasty: Total Hip Prosthesis, cementless – P169,400
  • Implants for Hip Arthroplasty: Partial Hip Prosthesis, bipolar – P73,180
  • Implants for Hip Fixation: Multiple screw fixation – P61,500
  • Implants for Pertrochanteric Fracture: Compression Hip Screw Set (CHS) – P69,000
  • Implants for Pertrochanteric Fracture: Proximal Femoral Locked Plate (PFLP) – P71,000
  • Implants for Femoral Shaft Fracture: Intramedullary Nail with Interlocking Screws – P48,740
  • Implants for Femoral Shaft Fracture: Locked Compression Plate (LCP) – P50,740
  • End-Stage Renal Disease Requiring Peritoneal Dialysis – P270,000 per year

MDG Related

Ang mga sakit at kondisyon din na kabilang sa mga itinakdang labanan ng Millennium Development Goals o MDG ay sinasagot din ng PhilHealth. Kabilang naman dito ang sumusunod:

  • Outpatient Malaria – P600.00
  • Outpatient HIV-AIDS – P30,000.00 per year (P7,500/quarter)
  • Outpatient Anti-Tuberculosis Treatment through Directly-Observed Treatment Short-course (DOTS) – P4,000 (P2,500 – Intensive phase; P1,500 – Maintenance Phase)
  • Voluntary Surgical Contraception Procedures – P4,000
  • Animal Bite Treatment – P3,000

 

Filed Under: Gabay Kalusugan, Gabay Philhealth Tagged With:

Benepisyong Pangkalusugan ng PhilHealth

March 3, 2015 by

Ang PhilHealth, o Philippine Health Insurance Corporation, ay ang ahenysa na ka-partner ng pamahalaan sa pagbibigay ng murang seguro at mga benepisyong pangkalusugan sa bawat Pilipino. Ito ay alinsunod sa Republic Act 9241  o National Health Insurance Act. Kaugnay nito, inaasahang magbayad ang bawat miyembro ng nakatakdang halaga (premium) kada buwan bago matamasa ang alinman sa mga benepisyong pangkalusugan. Nakasaad din na dapat ay may 3 buwang kontribusyon sa loob ng 6 na buwan bago ang pagkaka-ospital para makuha ang benepisyo ng PhilHealth. Makikita sa artikulong PhilHealth Contribution 2015 ang listahan ng nakatakdang buwanang kontribusyon ng bawat miyembro.

Nahahati sa apat na kategorya ang mga benepisyong maaaring tanggapin ng bawat miyembro ng PhilHealth. Ito ay ang sumusunod:

  1. Inpatient o mga pasyenteng naka-confine sa ospital.
  2. Outpatient o mga pasyenteng hindi naka-confine sa ospital.
  3. Z Benefits o mga sakit na malubha at nagkakahalaga na napakamahal.
  4. MDG Related o mga sakit na itinakdang labanan ng Millennium Development Goals.

Inpatient Benefits

  • Sagot ng PhilHealth ang ilang gastusin sa ospital gaya ng hospital charges at professional fee ng doktor.
  • Sagot din ng PhilHealth ang mga nakatakdang presyo para sa mga kondisyon at pamamaraang medikal (All Case Rates).
  • Ibabawas ng ospital ang lahat ng gastusing sagot ng PhilHealth sa Total Bill ng pasyente.
  • Kinakailangan lamang ang sapat na kontribusyon ng miyembro: 3 buwang kontribusyon sa loob ng 6 na buwan bago ang pagkaka-ospital.

Outpatient Benefits

  • Sagot ng PhilHealth ang ilang gastusin sa ospital gaya ng hospital charges at professional fee ng doktor.
  • Sagot din ng PhilHealth ang mga nakatakdang presyo para sa mga kondisyon at pamamaraang medikal (All Case Rates).
  • Ibabawas ng ospital ang lahat ng gastusing sagot ng PhilHealth sa Total Bill ng pasyente.
  • Kinakailangan lamang ang sapat na kontribusyon ng miyembro: 3 buwang kontribusyon sa loob ng 6 na buwan bago ang pagkaka-ospital.

Z Benefits

  • Sagot ng PhilHealth ang ilang gastusin ng mga pasyenteng dumaranas ng malulubhang sakit na nangangailangan ng matinding gastusan.
  • Kinakailangan lamang ang sapat na kontribusyon ng miyembro: 3 buwang kontribusyon sa loob ng 6 na buwan bago ang pagkaka-ospital.
  • Ang mga sakit na kabilang sa Z Benefits ng PhilHealth, pati na ang itinakdang presyo na sagot ng benepisyong ito ay ang sumusunod:
    • Acute Lymphocytic / Lymphoblastic Leukemia (standard risk) – P210,000
    • Breast Cancer (stage 0 to IIIA) – P100,000
    • Prostate Cancer (low to intermediate risk) – P100,000
    • End-state renal disease eligible for requiring kidney transplantation (low risk) – P600,000
    • Coronary Artery Bypass Graft Surgery (standard risk) – P550,000
    • Surgery for Tetralogy of Fallot in Children – P320,000
    • Surgery for Ventricular Septal Defect in Children – P250,000
    • Cervical Cancer: Chemoradiation with Cobalt and Brachytherapy (low dose) or Primary surgery for Stage IA1, IA2 – IIA1 – P120,000
    • Cervical Cancer: Chemoradiation with Linear Accelerator and Brachytherapy (high dose) – P175,000
    • Z MORPH (Mobility, Orthosis, Rehabilitation, Prosthesis Help) – first right and/or left below the knee – P15,000; both limbs – P30,000
    • Implants for Hip Arthroplasty: Implants Hip Prosthesis, cemented – P103,400
    • Implants for Hip Arthroplasty: Total Hip Prosthesis, cementless – P169,400
    • Implants for Hip Arthroplasty: Partial Hip Prosthesis, bipolar – P73,180
    • Implants for Hip Fixation: Multiple screw fixation – P61,500
    • Implants for Pertrochanteric Fracture: Compression Hip Screw Set (CHS) – P69,000
    • Implants for Pertrochanteric Fracture: Proximal Femoral Locked Plate (PFLP) – P71,000
    • Implants for Femoral Shaft Fracture: Intramedullary Nail with Interlocking Screws – P48,740
    • Implants for Femoral Shaft Fracture: Locked Compression Plate (LCP) – P50,740
    • End-Stage Renal Disease Requiring Peritoneal Dialysis – P270,000 per year

MDG Related

  • Sagot ng PhilHealth ang ilang gastusin ng mga pasyenteng dumaranas ng mga sakit na kabilang sa mga itinakdang labanan ng Millennium Development Goals (MDG).
  • Kinakailangan lamang ang sapat na kontribusyon ng miyembro: 3 buwang kontribusyon sa loob ng 6 na buwan bago ang pagkaka-ospital.
  • Ang mga sakit na kabilang sa mga nilalabanan ng MDG, pati na ang itinakdang presyo na sagot ng benepisyo ng PhilHealth ay ang sumusunod:
    • Outpatient Malaria – P600.00
    • Outpatient HIV-AIDS – P30,000.00 per year (P7,500/quarter)
    • Outpatient Anti-Tuberculosis Treatment through Directly-Observed Treatment Short-course (DOTS) – P4,000 (P2,500 – Intensive phase; P1,500 – Maintenance Phase)
    • Voluntary Surgical Contraception Procedures – P4,000
    • Animal Bite Treatment – P3,000
Filed Under: Gabay Kalusugan, Gabay Philhealth Tagged With:

PhilHealth Contribution Table 2015

March 3, 2015 by

Ang PhilHealth, o Philippine Health Insurance Corporation, ay ang ahenysa na ka-partner ng pamahalaan sa pagbibigay ng murang seguro at mga benepisyong pangkalusugan sa bawat Pilipino. Ang bawat miyembro nito ay inaasahang magbayad ng halaga (premium) na nakabase sa kanyang kinikita kada buwan. Noong January 2014, naglabas ang PhilHealth ng bagong listahan ng kontribusyon para sa mga empleyado, OFW, mga may sariling kita o indibidwal na nagbabayad, at mga kasali sa sponsored program ng PhilHealth. Ito ay epektibo hanggang sa taong 2015.

 

Para sa mga empleyado.

Ang bawat empleyado na miyembro ng PhilHealth at kabilang sa kategoryang ito, pati na ang kanilang mga benepisyaryo, ay makatatanggap ng kabuuang benepisyo ng PhilHealth gaya nag pagpapa-ospital, pagpapagamot sa mga malulubhang karamdaman gaya ng kanser, at iba pang mga benepisyo sa ilalim ng National Health Insurance Program (NHIP).

Philhealth

Para sa mga OFW

Ang mga Overseas Filipino Workers ay nabibilang sa Overseas Workers Program (OWP) ng PhilHealth. Sila ay inaasahang magbabayad ng kontribusyon na nagkakahalagang P2,400.00/taon. Maaari nila itong bayaran ng buo, P2,400.00, para sa taunang kabayaran, o kaya kalahati lamang, P1,200.00, para naman sa mga nais magbayad na kada 6 na buwan.

Para sa mga may sariling kita, at mga indibidwal na nagbabayad

Ang mga miyembro na may sariling kita (self-employed) at mga nagbabayad na indibidwal (individual paying members) ay maaaring magbayad base sa sumusunod:

  • Para sa mga kumikita kada buwan ng P25,000 o mas mababa pa – P2,400.00
  • Para sa mga kumikita kada buwan ng mas mataas sa P25,000 – P3,600.00

Ang mga miyembrong kabilang sa kategoryang ito ay maaaring magbayad kada 3 buwan (quarterly), 6 na buwan (semi-anually), o kada taon (anually).

Para sa mga sponsored

Ang mga miyembrong sponsored ay ang mga indibidwal na ang kabuuan o bahagi ng buong kabayaran ay sinusubsidyohan ng kaniyang sponsor na maaring nagmula sa mga LGU, pribadong sektor, mga mambabatas, at iba pang sangay ng pamahalaan. Sila ay may kontrobusyon na P2,400.00 kada taon.

Ayon din sa PhilHealth, ang mga miyembro na nasa ilalim ng kategoryang sponsored, pati na ang kanilang mga benepisyaryo ay makatatanggap ng kabuuang benepisyo ng PhilHealth gaya nag pagpapa-ospital, at pagpapagamot ng mga malulubhang karamdaman gaya ng kanser. Sila rin ay sakop ng No balance Billing (NBB) Policy at Primary Care Benefit 1 (PCB1) Package.

Filed Under: Gabay Kalusugan, Gabay Philhealth, Itanong kay Doc Tagged With:
Next Page »