Domperidone

Kaalaman sa Gamot na Domperidone

Generic name: domperidone

Brand name: Dispel, Dompenyl, Don-A, Dotillium, Gasidone, Motilium, Pepridon, Perilax, RiteMed Domperidone, Toridon

Para saan ang gamot na ito?

Ang domperidone ay mabisang gamot para sa ilang mga kondisyon sa sikmura. Karaniwan itong inirereseta para sa tuloy-tuloy na pag-dighay, kabag, heartburn, o impatso. Maaari din itong ireseta para sa kondisyon ng pagsusuka at pagliliyo na dulot ng pag-inom ng ibang gamot.

Anu-ano ang preparasyon ng gamot na Domperidone?

Ang gamot na domperidone ay maaaring nakahanda bilang tableta o likido na nakabote.

Paano ito ginagamit?

Dahil ang paggamit ng gamot na ito ay naiiba-iba depende kung ano at kung gaano kalala ang kondisyon na nararanasan, gamitin lamang ang gamot na ito ayon sa inireseta ng doktor o sa direksyon na nakasulat sa pakete ng gamot.

  • Ang domperidone ay iniinom nang walang laman ang tiyan. Maaaring 15-30 minuto bago kumain.
  • Ituloy lang ang pag-inom ng gamot sa buong haba ng panahon na inireseta ng doktor. Iwasang lumaktaw ng pag-inom at huwag titigil kahit pa bumuti na ang pakiramdam.
  • Kung sakaling makalimutan ang pag-inom, agad na inumin ang gamot sa oras na maalala. Ngunit kung malapit na sa oras ng kasunod na pag-inom, ituloy na lamang ang nakatakdang pag-inom at huwag nang balikan ang nakaligtaang pag-inom.
  • Hanggat hindi pinapayo ng doktor, huwag doblehin ang iniinom na gamot o ibahin ang oras ng pag-inom nito.
  • Itago sa lugar na may katamtamang temperatura at iwasang mabilad sa araw o mabasa. Ilayo rin ito sa maabot ng mga bata at agad ding itapon ang napasong gamot.

Ano ang mga dapat tandaan sa pag-inom ng Domperidone?

Bago resetahan ng gamot, importanteng ipaalam kaagad sa doktor kung ikaw ay may kondisyon gaya ng sumusunod:

  • allergy sa gamot na domperidone
  • buntis, nagpaplano na mag-buntis, o nagpapasuso
  • problema sa bato at atay
  • problema sa daluyan ng pagkain
  • umiinom ng iba pang gamot na nabibiling over-the-counter

Ipinagbabawal ang pag-inom ng alak at paninigarilyo kasabay ng pag-inom ng gamot na domperidone.

Gamitin lamang ang domperidone nang naaayon sa inireseta ng doktor, o nakasunod sa direksyon na nakasulat sa pakete ng gamot. Mahalaga din na sundin ang nakatakdang pagbisita sa doktor upang mabantayan progreso ng paggagamot sa sakit, malaman kung may pagbabago sa dami ng gamot na iinumin, o matignan kung may karagdagan pang pagsusuri na gagawin habang ginagamot.

Paano ang pag-inom nito sa mga bata?

Ang pag-inom ng domperidone sa mga kabataan ay nangangailangan ng masusing gabay mula sa doktor. Huwag basta-basta magbibigay ng gamot nang hindi kumukunsulta sa doktor o pediatrician.

May side effects ba ang gamot na Domperidone?

Bagaman ang side effects mula sa pag-inom ng gamot na domperidone ay bibihira, lalo na kung susunding mabuti ang direksyon ng pag-inom nito, hindi pa rin nawawala ang posibilidad ng pagkakaranas ng mga side effect. Agad na itigil ang pag-inom ng gamot at magpatingin sa doktor kung maranasan ang mga karaniwang side effects na gaya ng sumusunod:

  • Pananakit ng tiyan
  • pananakit ng ulo
  • panunuyo ng bibig
  • hirap sa pagtulog
  • pamamanas ng paa
  • iregularidad sa pagreregla
  • pagpapantal, hirap sa pag-hinga, at pamamaga ng katawan na sintomas ng allergy

Sa oras na maranasan ang mga masamang epekto ng gamot, agad na itigil ang pag-inom nito at magtungo sa doktor upang matignan.

Ano ang maaaring mangyari kung mapasobra ang pag-inom ng Domperidone?

Ang mga nabanggit na side effects ay maaaring maranasan sa oras na mapasobra ang pag-inom ng gamot. Agad na magpatingin sa doktor kung naoverdose ng gamot at nakakaranas ng mga epekto na nabanggit.