Ano ang gamot sa pangangati ng itlog ng lalaki?

May 20, 2013 By

Q: ano ang gamot sa pangangati sa itlog at singit sa ari ng lalaki yung hindi herbal

A: Ang pangangati sa bayag ng lalaki (scrotal itch) ay isang karaniwang kondisyon ang gamot dito ay nakapdepende sa sanhi. Ang dalawang kadalasang sanhi ng pangangati ng ilog ay isang fungal infection gaya ng hadhad, o isang allergy. Ang maselang bahagi ng katawan ng lalaki ay sensitibo sa pagbabago sa temperatura at dahil ito’y madalas ding nababasa, ito’y isang lugar kung saan pwedeng tumubo ang mga fungus, na syang sanhi ng hadhad o jock itch, na sya namang pwede ring dumapo sa itlog, hindi lang sa singit. Kung allergy nanman, ito’y iritasyon sa tela o kemikal.

Narito ang ilang mga hakbang na pwedeng gawin upang maiwasan ang pangangati:

  • 1. Huwag kamutin ang apektadong lugar, sapagkat lalong lalala ang pangangati kung ito’y kakamutin. OO, ALAM KO NA MAHIRAP PIGILAN NA MAGKAMOT pero dapat talagang iwasan.
  • 2. Panatilihing tuyo ang lugar at huwag magsuot ng masikip na brief para ‘mahakinga’ naman ang iyong mga maselang bahagi.
  • 3. Iwasang magpahid ng kung ano-anong cream, lotion, o powder sa itlog sapagkat baka ang mga kemikal na sangkap sa mga ito ang sanhi ng iritasyon ng balat. Iwasan ding ahitin ang bulbol o pubic hair sapagkat ang pag-aahit ay pwede ring magsanhi ng iritasyon.
  • 4. Gumamit lamang ng mild soap sa paliligo, at siguraduhing maligo pagkatapos magtrabaho o mag-exercise. Huwag hayaang mabasa ang bayag at singit.
  • 5. Tingnan ang artikulong “Hadhad: Sanhi, Sintomas, Gamot” sa Kalusugan.PH. Kung ikaw ay may hadhad, gumamit ng angkop ng cream (Terbinafine o Ketaconazole) upang masupil ang fungi na may dala nito.
  • 6. Kung hindi parin nawawala ang pangangati at kung may iba pang sintomas bukod dito, magpatingin na sa doktor.
Filed Under: Itanong kay Doc, Sa Kalalakihan, Sakit Tagged With: , ,

Mga kaalaman tungkol sa goiter

January 7, 2013 By


Ano ang goiter o bosyo?

Ang goiter, o bosyo, ay ang paglaki ng thyroid gland, isang bahagi ng katawan na natatagpuan sa leeg. Ang pangunahing sintomas nito ay ang paglaki o paglobo ng leeg, at ang pagkakaroon ng bukol sa ilalim ng lalamunan, na maaaring nasa kanan, kaliwa, o kaya parehas.

Ano ang sanhi ng goiter o bosyo?

Noong una (at hanggang ngayon, sa maraming bahagi ng mundo), ang karaniwang sanhi ng goiter o bosyo ay ang kakulangan ng iodine, isang kemikal na kailangan ng ‘thyroid’ upang makabuo ng mga ‘hormone’ na mahalaga sa pagpapanatili ng kaayusan sa pagtakbo ng katawan. Ngayon, dahil sa paglaganap ng paglalagay ng iodine bilang sangkap ng mga pagkain, kagaya ng ‘iodized salt’, bihira na ang mga taong nagkakaron ng bosyo dahil sa kakulangan ng iodine, bagamat sa mga liblib na lugar, gaya ng mga kabundukan na malayo sa dagat, posible parin itong maging isang sanhi.

Bukod sa kakulangan ng iodine, ang pagkakaroon ng mga ‘autoimmune disorder’, o mga sakit kung saan nagkakamali ang katawan sa pagtukoy kung ano ang bahagi nito at ano ang hindi, ay isa ring sanhi ng goiter o paglaki ng thyroid. Ang mga sakit na ito ay nakakaapekto sa produksyon ng ‘hormone’ sa thyroid gland. Kung pinaparami nito ang nabubuong ‘hormone’, ang tawag sa karamdaman ay ‘hyperthyroidism’. Kung nababawasan naman ang pagbuo ng ‘hormone’, ang tawag ay ‘hypothyroidism’.

Filed Under: Sakit Tagged With: , , ,

Paano maka-iwas sa tigdas-hangin o german measles?

December 22, 2012 By

Simple lamang ang pag-iwas sa tigdas-hangin: pagpapabakuna laban ito. Para sa mga bata at matanda, madali na lamang ngayong maiwasan ang tigdas-hangin. Magpunta lamang sa inyong doktor o ospital upang magpaturok ng bakuna. Ito’y lalong mahalaga sa mga kababaihang nais magdalang-tao na hindi pa nagkakaro ng tigdas-hangin, sapagkat ang ‘congenital rubella’ ay isang komplikasyon ng pagkakaron ng tigdas-hangin habang buntis na nakaka-apekto sa baby.

Tingnan ang mga rekomendado bakuna sa mga baby.

Tingnan ang sagot sa tanong tungkol sa congenital rubella.

TIGDAS-HANGIN SA KALUSUGAN.PH
Mga kaalaman sa tigdas hangin
Mga sintomas ng tigdas-hangin
Paano malamn kung may tigdas-hangin
Ano ang gamot sa tigdas-hangin?
Paano maka-iwas sa tigdas-hangin?

Filed Under: Sakit Tagged With: ,

Paano malaman kung may tigdas-hangin o german measles?

December 22, 2012 By

Dahil ang tigdas-hangin ay madaling matukoy base lamang sa itsura ng mga pantal, at sa pagkakasunod-sunod ng mga sintomas, hindi kinakailangan ng pagsusuri o mga laboratoryo upang malaman kung tigdas-hangin ang karamdaman.

Subalit, kung hindi klaro ang kondisyon, maaaring mag-request ang inyong doktor ng blood test kung saan titingnan ang ‘IgG’ at IgM’ antibody, na siyang reaksyon ng ‘immune system’ ng katawan sa virus na may taglay ng tigdas-hangin. Kung may ibang hinihinalang posibleng sanhi ng rashes, gaya ng dengue, maaari ring makatulong ang blood test upang makita ang bilang ng mga platelet, at iba pa.

Filed Under: Sakit Tagged With: ,

Ano ang gamot sa tigdas-hangin o german measles?

December 22, 2012 By

Walang gamot sa tigdas-hangin o german measles kung hindi ang maghintay na ito ay kusang mawala. Inuulit ko: ang tigdas-hangin ay isang karamdaman na kusang nawawala at hindi kinakailangan ng anumang gamot.

Subalit para sa mga sintomas ng tigdas-hangin, may mga pwedeng inumin na gamot o gawin upang magbigay-ginhawa. Kabilang na dito ang mga sumusunod:

  • 1. Uminom ng Paracetamol o Ibuprofen upang mawala ang lagnat, pananakit, at mabawasan ang pangangati. Huwag magbigay ng Aspirin sa mga bata. Sa pangangati, maaari ring uminom ng antihistamine.
  • 2. Huwag kamutin ang mga pantal, baka ito’y ma-impeksyon pa.
  • 3. Uminom ng maraming tubig, sapagkat kung ang pasyente, lalo na kung bata, ay nilalagnat, mabilis itong maubusan ng tubig sa katawan kaya dapat patuloy ang pag-inom ng tubig at iba pang liquids gaya ng juice.
  • 4. Bawal munang pumasok.

    • Isang linggo kalimitang tumatagal ang tigdas-hangin, at sa panahong ito ay maaaring makahawa ang pasyente, kaya para ikabubuti nya at para maka-iwas tayo sa pagpapalaganap pa ng tigdas-hangin, magpahinga na lang muna sa bahay.

May mga bawal ba sa taong may tigdas-hangin?

Wala naman, bukod sa pag-inom ng aspirin kung bata pa, o sa pagpasok sa school o opisina upang hindi makahawa at para makapahinga. Tandaan: Hindi bawal maligo! Tingnan ang sagot ng Kalusugan.PH tungkol sa tanong kung pwede bang maligo.

Kung hindi parin gumagaling ang sakit sa loob ng isang linggo, magpatingin na sa doktor.

Filed Under: Sakit Tagged With: ,

Ano ang sintomas ng tigdas-hangin o german measles?

December 22, 2012 By

Ang mga sumusunod ay mga pangunahing sintomas ng tigdas-hangin o german measles. Tandaan na bawat tao, matanda man o bata, may kani-kanyang katawan na iba’t iba ang reaksyon sa sakit, kaya ang mga sintomas ay naka-depende dito.

Rashes o pantal-pantal

Ang ‘rash’ o pantal-pantal ay ang pangunahing sintomas ng tigdas-hangin. Depende sa kulay ng balat, mamula-mula hanggang pink ang kulay ng rash. Ito ay nag-uumpisa muna sa ulo (kalimitan, sa likod ng tenga) at kumakalat pababa, sa dibdib, tiyan, hanggang sa mga kamay at paa.

Mala-trangkasong sintomas

Bukod sa ‘rash’, maaari ring magkaron ng ‘mala-trangkaso’ na sintomas gaya ng lagnat, ubo, at sipon. Ang mga sintomas na ito ay mas madalas mangyari sa mga nakakatanda, kung ikokompara sa mga bata. Bukod dito, ang pagkakaron ng tumutulong ilong (runny nose) o sakit ng ulo (headache) ay maaari ring maramdaman. Panghuli, ang pagkakaron ng mamula-mulang mata.

Mga kulani o lymph nodes

Minsan, kasabay o bago pa man magkaron ng rashes, maaaring magkaron ng mga kulani na namamaga (swollen lymph nodes) sa leeg.

Filed Under: Sakit Tagged With: ,

Paano makakaiwas sa pananakit ng bayag?

December 12, 2012 By

Ang pag-iwas sa pananakit sa bayag ay naka-depende sa sanhi nito, ang iba ay hindi maiiwasan sapagkat sila’y dulot ng ‘genetic factors’ o nasa lahi. Subalit may ilang uri na pwedeng maiwasan, gaya ng impeksyon, sa pamamagitan ng pag-iwas sa high-risk sexual behaviors o mga mapanganib at ‘di ligtas na pakikipag-sex, na siyang sanhi ng STD na maaaring maging sanhi naman ng impeksyon sa bayag.

Panatilihin ring maaliwalas at hindi mahigpit ang pagsusuot ng brief at pantalon. Kung sa pamilya ninyo ay may luslos, iwasan rin ang pagbubuhat ng mabigat, at panitilihang masigla at hindi nakakapagpataba ang kinakain upang hindi lumaki at tiyan.

Filed Under: Sakit Tagged With: , , , ,

Ano ang gamot sa pananakit ng bayag?

December 12, 2012 By

Ang gamot sa pananakit sa bayag ay naka-depende sa anumang sanhi nito, subalit sa pangkalahatan ay narito ang mga hakbang na pwedeng gawin:

1. Kung masakit na masakit ang bayag, dalhin agad ito sa ospital upang masuri at matiyak na ito’y hindi isang emergency.

2. Kung ang pananakit ay hindi malala at pawala-wala, baka ang sanhi nito ay simple lang. Kung gayon, siguraduhing hindi mahigpit ang brief, sinturon, o pantalon. Kapag ang bayag ay nasasakal, ito’y maaaring magdulot ng pananakit. Subalit kung tuloy parin ito, magpatingin na sa doktor.

3. Maaaring uminom ng mga pain reliever gaya ng ibuprofen o paracetamol para mabawasan ang kirot, subalit ito ay panandalian lamang; kung ang sintomas ay hindi naaawat, ipatingin na ito sa doktor upang mabigyan ng angkop na gamot.

4. Paminsan, ang paglublob sa maligamgam na tubig ay nakakapagbigay-ginawa rin sa bayag.

Filed Under: Sakit, Sintomas Tagged With: , , , ,

Ano ang pagsusuri sa pananakit ng bayag?

December 12, 2012 By

Ang mga pagsusuri sa pananakit ng bayag ay nakadepende sa hinala ng doktor kung ano ba ang sanhi nito. Sa maraming kaso, ang eksaminasyong pisikal sa gagawin ng doktor ay sapat na upang magkaron ng diagnosis, subalit minsan ay kailangan ng mga espesyal na eksaminasyon. Mga halimbawa:

1. Ultrasound. Hindi lamang babae na inuultrasound! Maging ang mga kondisyon sa tiyan, bituka, at maging sa bayag ay maaaring masilip sa pamamagitan ng ultrasound.

2. Urinalysis o pagsusuri ng ihi. Kung may impeksyon sa ihi o UTI, ito’y maaaring makita sa urinalysis.

3. Complete blood count o blood test: Kung impeksyon ay hinihinala, ang mga ‘white blood cells’ ay magiging mataas.

4. Iba pang eksaminasyon, depende sa diagnosis.

Filed Under: Sakit, Sintomas Tagged With: , , , ,

Ano ang sintomas ng pananakit ng bayag?

December 12, 2012 By

Ang pananakit ng bayag ay isang sintomas na mismo nito: ang pagkaranas ng pagkirot o pananakit. Subalit, depende sa sanhi nito, may mga kaibihan din sa presentasyon ng karamdaman:

1. Kung ito’y luslos, maaaring makaranas ng pasumpong-sumpong na paglaki at pagliit ng bayag, sa kadahilanang minsan ay lumuluslos (o nalalaglag) ang isang bahagi ng bituka sa bayag. Ito’y pwedeng may kasamang kirot, pero pwede rin namang wala.

2. Kung ito’y ‘testicular torsion’ o pagkakapulupot ng ugat ng itlog, may pananakit ng lubha, biglaan, at maaaring may kasamang pagbabago ng kulay ng bayag (hal. pangingitim).

3. Kung ito naman ay impeksyon (epididymitis), gaya ng UTI o STD, pwdeng may kaakibat na pananakit o pagkirot habang umiihi, balisawsaw, nana na tumutulo sa lagusan ng ihi (urethra), mga kulani sa singit, o lagnat.

Kadalasan ay nangangailangan ng pagsusuri ng doktor upang matukoy ang mga sintomas sa nakapaloob o kaakibat ng pananakit ng bayag.

Filed Under: Sakit Tagged With: , , , ,
« Older Posts

Mga Sakit

A-Z Specialization
ABCDEFGHIJKLMNOPQRSTUVWXYZ

Mga Sintomas

A-Z Ad-Hoc
ABCDEFGHIJKLMNOPQRSTUVWXYZ
Ang Kalusugan.PH ang sumusuporta sa adhikaing makamit ang Kalusugang Pangkalahatan sa Pilipinas
© 2010-2011 Gideon Lasco MD at Kalusugan.PH. Ang mga artikulo at materyales sa website na ito ay para sa kaalamang pampubliko at heneral na edukasyon. Hindi ito dapat maging halili o kapalit ng pagkonsulta sa doktor, pagsusuri at paggamot ng mga karamdaman. Tingnan ang buong Patakaran ng Website.