Ano ang gamot sa tigdas-hangin o german measles?

Walang gamot sa tigdas-hangin o german measles kung hindi ang maghintay na ito ay kusang mawala. Inuulit ko: ang tigdas-hangin ay isang karamdaman na kusang nawawala at hindi kinakailangan ng anumang gamot.

Subalit para sa mga sintomas ng tigdas-hangin, may mga pwedeng inumin na gamot o gawin upang magbigay-ginhawa. Kabilang na dito ang mga sumusunod:

  • 1. Uminom ng Paracetamol o Ibuprofen upang mawala ang lagnat, pananakit, at mabawasan ang pangangati. Huwag magbigay ng Aspirin sa mga bata. Sa pangangati, maaari ring uminom ng antihistamine.
  • 2. Huwag kamutin ang mga pantal, baka ito’y ma-impeksyon pa.
  • 3. Uminom ng maraming tubig, sapagkat kung ang pasyente, lalo na kung bata, ay nilalagnat, mabilis itong maubusan ng tubig sa katawan kaya dapat patuloy ang pag-inom ng tubig at iba pang liquids gaya ng juice.
  • 4. Bawal munang pumasok.
  • Isang linggo kalimitang tumatagal ang tigdas-hangin, at sa panahong ito ay maaaring makahawa ang pasyente, kaya para ikabubuti nya at para maka-iwas tayo sa pagpapalaganap pa ng tigdas-hangin, magpahinga na lang muna sa bahay.

May mga bawal ba sa taong may tigdas-hangin?

Wala naman, bukod sa pag-inom ng aspirin kung bata pa, o sa pagpasok sa school o opisina upang hindi makahawa at para makapahinga. Tandaan: Hindi bawal maligo! Tingnan ang sagot ng Kalusugan.PH tungkol sa tanong kung pwede bang maligo.

Kung hindi parin gumagaling ang sakit sa loob ng isang linggo, magpatingin na sa doktor.